काठमाडौँ । मुलुकको प्रमुख प्रशासनिक केन्द्र सिंहदरबारमा रहेको संसद भवनले प्रधानमन्त्री वालेन्द्र शाह, वालेनको बोली खोजेको हिजोदेखि हो । तर पाएको छैन । अहिले मुलुकको संघीय संसदको बर्खे अधिवेशन चलिरहेको छ ।
गत सोमबार नेपाल सरकारको नीति तथा कार्यक्रम संसदमा प्रस्तुत गरे राष्ट्रपति रामचन्द्र पौडेलले । र, हिजो उक्त नीति तथा कार्यक्रमका बारेको छलफल सकिएपछि प्रधानमन्त्रीले जवाफ दिनुपर्ने संसदको कार्यसूची थियो ।
तर, त्यसका लागि प्रधानमन्त्री वालेन्द्र शाह तयार भएनन्, अर्थात् संसदमै गएनन् । उता विपक्षी दलहरुले भने निरन्तर रुपमा नै प्रधानमन्त्रीको उपस्थिति खोजिरहे । संसदमा प्रधानमन्त्री उपस्थित हुन माग गरिरहे । तर प्रधानमन्त्री सिंहदरबारमा त थिए, संसदसम्म पुगेनन् ।
हिजो बिहान ११ बजे प्रतिनिधिसभा र १२ बजे राष्ट्रिय सभाको बैठक निर्धारण गरिएको थियो । प्रतिनिधिसभाको कार्यसूचीमै प्रधानमन्त्रीले नेपाल सरकारको नीति तथा कार्यक्रममा जवाफ दिने भन्ने थियो । सोही अनुसार सभामुखले संसदको कार्यसूची अघि बढाए तर जवाफ भने प्रधानमन्त्रीका तर्फबाट अर्थमन्त्री स्वर्णिम वाग्लेले दिने भनेर तय गरियो । त्यसपछि प्रतिपक्षी सबै दलले प्रधानमन्त्रीको उपस्थिति मागे ।
यता प्रधानमन्त्री शाहले भने १०ः३० बजे मन्त्रिपरिषदको बैठक आह्वान गरे । हिजोको मन्त्रिपरिषदको बैठकले संघीय मन्त्रालयको संख्या २२ बाट घटाएर १८ बनाउने निर्णय पनि गर्यो र त्यो समाचार निकै चाँडै सार्वजनिक पनि गर्यो ।
तर उता हिजो प्रतिनिधिसभाको बैठक ३ पटक सम्म आह्वान भयो बस्न सकेन । विपक्षी दलहरुले संसदमा बोलेर र उठेरै विरोध गरिरहे । श्रम संस्कृति पार्टीले त बैठक नै बहिस्कार गर्यो । तर पनि प्रधानमन्त्री सिंहदरबारको प्रधानमन्त्री कार्यालयबाट त्यस्तै ३०० मीटर जति पर रहेको संसद भवनसम्म पुग्नै सकेनन् ।
यसैकारण हिजो बैठक स्थगित गरियो र आज बिहान ११ बजे बोलाइएको छ । हेरौँ, आज पनि नीति तथा कार्यक्रममा जवाफ प्रधानमन्त्रीले नै दिने कार्यसूची जारी भएको छ । हेरौँ, आज प्रधानमन्त्री उपस्थित हुन्छन्, हुँदैनन् । संसदले खोजिरहेको वालेनको बोली आज भेटिन्छ, भेटिँदैन ।
