काठमाडौं । रसुवाको भोटेकोसी क्षेत्रमा बाढीबाट प्रभावित नागरिकका लागि राहत तथा उद्धार कार्यलाई थप व्यवस्थित र प्रभावकारी बनाउन प्रधानमन्त्री वालेन्द्र शाहको सचिवालयले व्यक्तिगत रूपमा प्रभावित क्षेत्रमा नजान आग्रह गरेको छ।
प्रधानमन्त्री सचिवालयले पूर्वसमन्वयविना साना निजी सवारी साधनमा थोरै–थोरै राहत सामग्री बोकेर प्रभावित क्षेत्रमा जाने क्रम बढ्दा सडकमा अत्यधिक सवारी चाप र ट्राफिक जाम सिर्जना भएको जनाएको छ।
सवारी चापका कारण आपत्कालीन बिरामी बोकेका एम्बुलेन्सलाई सहज रूपमा आवतजावत गर्न कठिनाइ हुनुका साथै नेपाल सरकारका मुख्य उद्धार टोली र प्राथमिकताका राहत सामग्री बोकेका सवारीसमेत समयमै गन्तव्यमा पुग्न समस्या भइरहेको सचिवालयले जनाएको छ।
विषम अवस्था र जोखिमयुक्त भूगोलमा पूर्वतयारीबिना पुग्दा राहत तथा उद्धारमा खटिएका व्यक्तिहरू स्वयंको सुरक्षामा समेत जोखिम बढेको सचिवालयको भनाइ छ।
सचिवालयले राहत तथा उद्धार कार्यलाई थप भद्रगोल र जोखिमयुक्त हुन नदिन व्यक्तिगत रूपमा प्रभावित क्षेत्रमा जाने कार्य रोक्न आग्रह गरेको छ। सहयोग गर्न चाहने नागरिक, स्वयंसेवी संस्था तथा सरोकारवालाले अनिवार्य रूपमा सम्बन्धित जिल्लाको जिल्ला प्रशासन कार्यालय (सीडीओ कार्यालय) मा सम्पर्क गरी पूर्वसमन्वय गरेर मात्र राहत सामग्री हस्तान्तरण वा परिचालन गर्न अनुरोध गरिएको छ।
सम्बन्धित सीडीओ कार्यालयले क्षेत्रगत आवश्यकता र प्राथमिकताका आधारमा प्राप्त राहत सामग्रीलाई सोझै प्रभावित स्थानमा पुर्याउने एकीकृत व्यवस्था मिलाउने सचिवालयले जनाएको छ।
प्रधानमन्त्री सचिवालयले विपद्को कठिन घडीमा पीडितलाई सहयोग गर्ने नागरिक तथा सामाजिक संस्थाहरूको भावना र तत्परता सराहनीय रहेको उल्लेख गर्दै राज्यको आधिकारिक संयन्त्रमार्फत अनुशासित र व्यवस्थित रूपमा राहत उपलब्ध गराई उद्धार कार्यमा सहयोग पुर्याउन सबैमा अपिल गरेको छ।
