काठमाडौं । रसुवास्थित एक जलविद्युत् आयोजनाको सुरुङ (टनेल) भित्र बाढीका कारण फसेका मानिसहरूको उद्धार कार्य नेपाली सेनाले तीव्र पारेको छ।
जटिल भूगोल तथा जोखिमपूर्ण अवस्थाका बाबजुद सेनाको उद्धार टोलीले आज बिहानैदेखि सुरुङभित्र फसेकाहरूको खोजी तथा उद्धार कार्य जारी राखेको छ। हालसम्म सुरुङबाट दुई जनाको सकुशल उद्धार गरिएको नेपाली सेनाले जनाएको छ।
सुरुङभित्र अझै कति जना फसेका छन् भन्ने यकिन विवरण प्राप्त भइनसकेको भन्दै सेनाले खोजी कार्यलाई निरन्तरता दिएको छ। उद्धारका क्रममा सुरुङभित्रको अवस्था अप्ठ्यारो र जोखिमपूर्ण रहेकाले विशेष सावधानी अपनाइएको छ।
सेनाले प्राविधिक उपकरण तथा विशेष तालिमप्राप्त उद्धार टोली परिचालन गरी सुरुङभित्र रहेका अन्य व्यक्तिको खोजी गरिरहेको छ। जोखिमपूर्ण परिस्थितिका बीच पनि बाँकी व्यक्तिहरूको सकुशल उद्धारका लागि प्रयास जारी रहेको सेनाले जनाएको छ।
