काठमाडौं। आईसीसी क्रिकेट विश्वकप लिग–२ अन्तर्गत आगामी शृंखलाको तयारीस्वरूप शनिबार खेलिएको अभ्यास खेलमा स्कटल्यान्डले नेपाल ‘ए’ टोलीसामु जितका लागि ३०३ रनको लक्ष्य प्रस्तुत गरेको छ।
काठमाडौंस्थित मूलपानी क्रिकेट मैदानमा टस जितेर पहिले ब्याटिङ गरेको स्कटल्यान्डले निर्धारित ओभरमा आठ विकेट गुमाउँदै ३०२ रन बनाएको हो।
स्कटल्यान्डका लागि ओपनर ब्याट्सम्यान जर्ज मुन्सीले उत्कृष्ट अर्धशतकीय पारी खेले। उनले ५१ बलमा तीन छक्का र ६ चौकाको मद्दतमा ६२ रन बनाए। माइकल इङ्लिसले पनि अविजित ५६ रन जोड्दै टोलीको स्कोर मजबुत बनाए।
त्यस्तै फिनले म्याक्रेथले ३० रन, ब्रान्डन म्याकमुलेनले ३९ रन तथा रिची बेरिङ्टनले ४० रनको योगदान दिए। म्याथ्यू क्रसले २५ रन बनाउँदा ज्याक जार्भिसले ३० रन थपे।
नेपाल ‘ए’ का लागि आकाश चन्द सर्वाधिक सफल बलर बने। उनले तीन विकेट लिए। शेर मल्ल, विपिन खत्री, पवन सर्राफ र कुशल मल्लले समान एक/एक विकेट हात पारे।
