काठमाडौँ। संस्कृति, पर्यटन तथा नागरिक उड्डयनमन्त्री खडकराज पौडेलसँग नेपालका लागि युरोपियन युनियनका राजदूत भेरोनिक लोरेन्जोले शिष्टाचार भेटवार्ता गर्नुभएको छ ।
आज यहाँ मन्त्रालयमा भएको भेटवार्तामा संस्कृति, पर्यटन प्रवर्द्धन र हवाई सुरक्षालगायत समसामयिक विषयमा छलफल भएको मन्त्री पौडेलको सचिवालयले जनाएको छ ।
मन्त्री पौडेलले सांस्कृतिक सम्पदा, आध्यात्मिक परम्परा र प्राकृतिक सुन्दरताले नेपाललाई आरोग्यको प्रमुख केन्द्रका रूपमा स्थापित गर्ने आधार तयार गरेको उल्लेख गर्दै सहकार्यका सम्भावनाबारे चर्चा गर्नुभएको थियो । उहाँले नेपालको हवाई उड्डयन सुरक्षा र नेपाल नागरिक उड्डयन प्राधिकरणको संस्थागत क्षमता सुदृढीकरणका लागि गरिएका प्रयास, आरोग्य पर्यटनसहित पर्यटन प्रवर्द्धनका लागि भएका नीतिगत सुधारहरूबारे पनि जानकारी गराउनुभयो ।
राजदूत लोरेन्जोले संस्कृति तथा पर्यटन प्रवर्द्धनका क्षेत्रमा सहकार्य गर्ने प्रतिबद्धता व्यक्त गर्नुभयो । उहाँले नेपाललाई हवाई सुरक्षा सूचीबाट हटाउनु इयू र नेपाल दुवैको साझा लक्ष्य रहेको बताउँदै नेपालले हवाई सुरक्षा सुधारमा गरेको प्रयास तथा क्षेत्रीय समस्या समाधानमा देखाएको तदारुकताप्रति सन्तोष व्यक्त गर्नुभयो । रासस
