काठमाडौँ । नेपाल राष्ट्र बैंकले बैंकिङ प्रणालीमा देखिएको अधिक तरलता व्यवस्थापन गर्न विहीबार १२० अर्ब रुपैयाँ बराबरको निक्षेप संकलन गर्ने भएको छ।
केन्द्रीय बैंकले बोलकबोल (अक्सन) प्रक्रियामार्फत ९७ दिन अवधिको लागि उक्त निक्षेप संकलन गर्न लागेको जनाएको छ। यसरी संकलित रकमको साँवा र ब्याज २०८३ साल साउन २० गते एकमुष्ट भुक्तानी गरिने जानकारी दिइएको छ।
राष्ट्र बैंकका अनुसार निक्षेप संकलन उपकरणको बोलकबोलमा “क”, “ख” र “ग” वर्गका बैंक तथा वित्तीय संस्थाहरू मात्र सहभागी हुन पाउने व्यवस्था गरिएको छ। बैंकिङ प्रणालीमा बढ्दो तरलता सन्तुलनमा राख्न केन्द्रीय बैंकले समय–समयमा यस्ता उपकरण प्रयोग गर्दै आएको छ।
