काठमाडौँ । नेपाली कांग्रेसका निवर्तमान कार्यवाहक सभापति पूर्णबहादुर खड्का पक्षको बैठक सुरु भएको छ
धुम्बाराहीस्थित होटल स्मार्टमा जारी बैठकमा खड्का समूहका शीर्ष नेतासहित १४ औं महाधिवेशनबाट निर्वाचित केन्द्रीय सदस्य, जिल्ला सभापतिहरु तथा उपत्यकामा उपलब्ध क्षेत्रीय सभापतिहरुको उपस्थिति रहेको जनाइएको छ ।
यसअघि ६ वैशाखमा सोही स्थानमा बसेको बैठकले ‘पर्ख र हेर’को रणनीति अपनाउने निष्कर्ष निकालेको थियो । पछिल्लो समय पार्टीभित्रको राजनीतिक घटनाक्रमका बीच खड्का समूहले पुनः छलफललाई निरन्तरता दिएको हो ।
विशेष महाधिवेशनबाट गगन थापाको नेतृत्वमा पार्टी पुनर्गठन भएपछि खड्का असन्तुष्ट रहँदै आएका छन् । उनले उक्त महाधिवेशन खारेज गर्न माग गर्दै सर्वोच्च अदालतमा रिट दायर गरेका थिए । तर, अदालतले रिट खारेज गर्दै थापा नेतृत्वको कांग्रेसलाई वैधता दिएपछि पनि खड्का समूहले आन्तरिक परामर्श र रणनीतिक बैठकलाई निरन्तरता दिएको छ ।
