काठमाडौँ । कृषि तथा पशुपन्छी विकास तथा वन तथा वातावरण मन्त्री गीता चौधरीले रासायनिक मल आपूर्तिलाईञ उच्च प्राथमिकतामा राख्दै कूटनीतिक पहल तीव्र पार्नुभएको छ।
मन्त्री चौधरीले परराष्ट्र मन्त्री शिशिर खनालसँग भेटवार्ता गर्दै मल आपूर्तिमा देखिएको समस्या समाधानका लागि परराष्ट्र मन्त्रालयमार्फत सक्रिय पहल अघि बढाउन आग्रह गर्नुभएको हो।
पश्चिम एशियामा विकसित भएको संकटका कारण अन्तर्राष्ट्रिय आपूर्ति शृंखलामा आएको अवरोधलाई ध्यानमा राख्दै आपूर्ति व्यवस्थापन सहज बनाउन सरकार सक्रिय बनेको मन्त्रालयले जनाएको छ।
हाल उपलब्ध रासायनिक मलको मौज्दात व्यवस्थापनका लागि मन्त्रालयले सम्बन्धित निकायहरूलाई आवश्यक जानकारी गराइसकेको छ। सरकारी तथ्यांकअनुसार हालको मौज्दात असार महिनासम्म पुग्ने अनुमान गरिएको छ।
यसपछिको आवश्यकता पूर्ति गर्न सरकारले थप १ लाख ५० हजार मेट्रिक टन रासायनिक मल जी–टु–जी (सरकार–सरकार) माध्यमबाट खरिद गर्ने निर्णय गरिसकेको छ। २०७९ चैत १९ गतेको मन्त्रिस्तरीय निर्णयअनुसार परराष्ट्र मन्त्रालयमार्फत भारतीय पक्षसँग समन्वय प्रक्रिया अघि बढाइएको छ भने नेपालस्थित भारतीय दूतावाससँग पनि आवश्यक संवाद भइरहेको जनाइएको छ।
यसैबीच, सम्भावित अभावलाई मध्यनजर गर्दै वैकल्पिक स्रोतबाट मल आपूर्ति सुनिश्चित गर्नका लागि पनि सरकारले समानान्तर पहल गरिरहेको मन्त्रालयले जनाएको छ।
