काठमाडौँ । नेपाली कांग्रेसको आधिकारिता गगन थापा पक्षीय कांग्रेसले पाएको छ ।
सर्वोच्च अदालतलका न्यायाधीशद्वय सारंगा सुवेदी र नृपध्वज निरौलाको संयुक्त इजलास ले थापाको नेतृत्वलाई आधिकारिकता दिने आदेश जारी गरेको छ ।
निवर्तमान सभापति शेरबहादुर देउवासहितले दायर गरेको रिटमा सुनुवाई गर्दे ईजलासले निर्वाचन आयोगको निर्णय सदर गरेको हो ।
गएको पुस महिनाको अन्तिम साता विशेष महाधिवेशन गरेर कांग्रेसका तत्कालीन सभापति शेरबहादुर देउवा र कार्यबाहक सभापति पूर्णबहादुर खड्कासहित १४ औँ महाधिवेशनबाट निर्वाचित नेतृत्वलाई हटाएको घोषणा गरेपछि कांग्रेसमा विवाद चर्किएको थियो । सो विशेष महाधिवेशनले सभापतिमा गगन थापा र उनको नेतृत्वको टिमलाई चयन गरेपछि निर्वाचन आयोगले पनि सोही समितिलाई नै मान्यता दिएको थियो ।
सो निर्णयको विरुद्धमा कार्यबाहक सभापति पूर्णबहादुर खड्का सर्वाेच्चमा रिट दायर गरेका थिए । उनले गगन नेतृत्वको कांग्रेस अवैधानिक, विशेष महाधिवेशन नै अनियमित भनेर सर्वोच्चमा रिट हालेका थिए । गएको माघ ६ गते खड्काले सर्वोच्चमा रिट हालेपछि सुरु भएको लामो समयको सुनुवाइपछि आज सर्वोच्चले यो फैसला सुनाएको हो ।
सर्वोच्चले आजको फैसलामा गगन थापा सभापति रहेको कांग्रेसलाई मान्यता दिँदै त्यसैमा मिलेर जान भनेको हो । यो फैसला पछि अब कि मिलेर गगनको नेतृत्वमै कांग्रेस अघि बढ्नुपर्नेछ भने यदि यो स्वीकार नगर्ने हो भने देउवा पक्षीय कांग्रेसले अर्काे पार्टी खोल्नुपर्नेछ । यता हिजोमात्र कांग्रेसको कार्यबाहक सभापतिको हैसियतमा नै कांग्रेसको लेटर हेड प्रयोग गरेर खड्काले विज्ञप्ति प्रकाशन गरेकोमा गगन पक्षीय कांग्रेसको अनुशासन समितिले खड्कालाई स्पष्टिकरण सोधेको छ ।
खड्काले भने सर्वोच्च अदालतमा कांग्रेसको आधिकारिकता सम्बन्धी विवादको मुद्दा विचाराधीन रहेकाले त्यतिञ्जेल सम्मका लागि आफू नै कार्यबाहक सभापति रहेको बताउने गरेका छन् ।
