काठमाडौँ । नेकपा (एमाले) का प्रमुख सचेतक ऐन महरले सुदूरपश्चिममा पछिल्लो समय भएका सवारी दुर्घटनाप्रति सरकारको गम्भीर ध्यानाकर्षण गराएका छन्। उनले सडकमा नागरिकको सुरक्षाको अवस्था कमजोर बन्दै गएको भन्दै दुर्घटनाका दोषीलाई कडा कानुनी कारबाही गर्न माग गरेका हुन्।
प्रतिनिधिसभाको सोमबारको बैठकमा आकस्मिक समयमा बोल्दै महरले कैलालीको अत्तरियामा भएको सिन्की बोहराको मृत्यु र धनगढीमा भएको नन्दलाल गिरीको मृत्युको घटना प्रतिनिधिसभामा उठाएका हुन्।
महरका अनुसार बझाङको मष्टा गाउँपालिका–६ की सिन्की बोहरालाई भदौ ७ गते बेलुका अत्तरियामा महाकाली यातायातको बसले ठक्कर दिएको थियो। बसको ठक्करबाट सडकमा लडेकी बोहरालाई चालकले पुनः बस ब्याक गरेर किचेको प्रत्यक्षदर्शीको भनाइ रहेको उनले बताए।
उनले उक्त घटना सामान्य सडक दुर्घटना नभई अत्यन्त क्रूर घटना भएको भन्दै चालक रोहित सिंह धामीमाथि कडा कारबाही गर्न माग गरे। घटनापछि मृतकका परिवारले हालसम्म शवसमेत बुझ्न नसकेको भन्दै उनले पीडित परिवारलाई न्याय दिलाउन सरकार गम्भीर हुनुपर्ने बताए।
त्यसैगरी, धनगढी उपमहानगरपालिका–८ बुद्धचोकमा भदौ १ गते भएको दुर्घटनामा ६२ वर्षीय नन्दलाल गिरीको मृत्यु भएको विषय पनि महरले संसद्मा उठाए। मर्निङ वाक सकेर घर फर्किने क्रममा जेब्रा क्रसिङबाट सडक पार गर्दै गरेका गिरीलाई सु.प.प्र. ०१–००१ ज १८७९ नम्बरको हाइसले ठक्कर दिएको थियो। उपचारका क्रममा उनको भदौ ७ गते भारतको ल
खनउमा मृत्यु भएको महरले जानकारी दिए।‘जेब्रा क्रसिङमा समेत नागरिक सुरक्षित छैनन् भने सडक सुरक्षाको अवस्था के छ ?’ भन्दै महरले सरकारसँग प्रश्न गरे।
उनले दुवै घटनाका दोषीलाई कानुनी दायरामा ल्याउन, पीडित परिवारलाई उचित न्याय र क्षतिपूर्ति उपलब्ध गराउन तथा सुदूरपश्चिममा सडक सुरक्षा प्रभावकारी बनाउन सरकारको ध्यानाकर्षण गराए।
