काठमाडौं । सागअन्तर्गत बक्सिङ खेलमा नेपालले २० वर्षपछि स्वर्ण पदक जितेको छ । सातदोबाटोमा सोमबार भएको खेलमा मीनु गुरुङ र भुपेन्द्र थापाले नेपालका लागि स्वर्ण पदक दिलाएका हुन् । मीनुले महिला ५४ केजी तौल समूहमा भारतीय खेलाडीलाई अंकका आधारमा पराजित गर्दै स्वर्ण जितेकी हुन् ।
अघिल्लो संस्करणमा कांस्य पदक विजेता मिनुले फाइनल प्रतिस्पर्धामा श्रीलंकन र भारतीय खेलाडीलाई हराएकी हुन् । यसैगरी ६४ केजी तौल समूहमा भारतीय बक्सरलाई पराजित गर्दै थापाले पनि स्वर्ण पदक जितेका हुन् । उनले भारतका मनिष कौशिकलाई हराएर स्वर्ण जित्न सफल भएका हुन् ।
सन् २०१८ को कमन वेल्थ गेम्समा रजत पदक जितेका मनिषलाई हराउन पावरले पेलेरै जानुपर्ने रणनीतिमा आफू उत्रिएको उनले बताए । यसअघि नेपालले सन् १९९९ काठमाडौंमा भएको आठौँ सागमा बक्सिङतर्फ दुईवटा स्वर्ण जितेको थियो । सन् १९९९ मा नेपालका लागि प्रकाश थापा मगर र रामचन्द्र थापा मगरले स्वर्ण जितेका थिए ।
