काठमाडौं । कालापानी र लिपुलेकअंकित भारतीय नक्सा खारेजीको माग गर्दै नेपाल मजदुर किसान पार्टीले भारतीय दूतावासमा विरोधपत्र बुझाएको छ । भारतले नेपाली भूमि अतिक्रमण गरेको विरोधमा पार्टीले जिल्ला र क्षेत्रीयस्तर हुँदै काठमाडौं उपत्यकामा प्रदर्शन र धर्नापछि विरोधपत्र बुझाएको केन्द्रीय सदस्य सुरेन्द्रराज गोर्साइंले बताए । नेमकिपाले काठमाडौंमा सोमबार रत्नपार्कदेखि लैनचौरसम्म प्रदर्शन गरेको थियो । यसअघि पार्टीका संगठन भएका २५ भन्दा बढी जिल्लामा पनि विरोध प्रदर्शन गरिएको गोर्साइंले जानकारी दिए ।
नेमकिपाले बुझाएको विरोधपत्रमा भारतले नेपाली भूमिप्रति गरेको बलमिचाइँको कारण दुई देशबीचको सम्बन्धमा गतिरोध उत्पन्न भएको उल्लेख छ । नेमकिपाले अतिक्रमित भूमि तत्काल फिर्ता दिन समेतमाग गरेको छ । नेमकिपाका केन्द्रीय सचिव प्रेम सुवालले ज्ञापनपत्र बुझाउँदै नेपाल र बेलायत–भारतबीच सन् १८१६ मा भएको सुगौली सन्धिअनुसार महाकाली नदीको उद्गमस्थल लिम्पियाधुरादेखि पश्चिमसम्मको भाग नेपालकै भएको धारणा राखे ।
उनले नेपाली भूमि लिम्पियाधुरा, कालापानी र लिपुलेकसमेत भारतमा गाभेर तयार गरिएको नयाँ नक्सा अविलम्ब खारेज गर्नुपर्ने बताए । विरोधपत्र बुझ्दै भारतीय दूतावासका द्वितीय सचिव डा. अजय कुमारले नेपाली जनताका माग र धारणाबारे आफूहरू जानकार भएको प्रतिक्रिया दिए । सीमा विवादको समस्या आपसी छलफलमा टुंग्याउनुपर्ने बताउँदै ज्ञापनपत्र भारतीय प्रधानमन्त्री नरेन्द्र मोदीसम्म पुर्याउने उनले बताए ।
प्रदर्शनका क्रममा दूतावास घेराउ गर्दै नेमकिपाका नेता–कार्यकर्ताले भारतीय हस्तक्षेप बन्द गर्, भारतको नक्सा खारेज गर्, कालापानी हाम्रै हो, लिपुलेक पनि हामै्र हो, भारतीय सेना कालापानी छोड् भन्दै नाराबाजीसमेत गरेका थिए । धर्ना र प्रदर्शनमा नेमकिपाका केन्द्रीय सदस्य तथा प्रदेश सांसद सिर्जना सैँजू, नेमकिपाका केन्द्रीय सदस्य तथा भक्तपुर नगरपालिकाका प्रमुख सुनील प्रजापतिलगायत केन्द्रीय नेता–कार्यकर्ता सहभागी थिए । नयाँ पत्रिका दैनिकबाट
