काठमाडौं । कालीरानी फिल्म्स प्रा.लि.ले निर्माणाधीन चलचित्र ‘पाँच पाण्डव’बाट कलाकार सागर लम्साल (बले) लाई निष्कासन गरेको छ। सामाजिक सञ्जालमा उनीमाथि बलात्कारको आरोप सार्वजनिक भएपछि फिल्म निर्माण पक्षले नैतिक आधारमा उनलाई परियोजनाबाट हटाउने निर्णय गरेको हो।
कम्पनीले आज जारी गरेको प्रेस विज्ञप्तिमा उल्लेख भएअनुसार अमेरिकामा अध्ययनरत एक युवतीले सामाजिक सञ्जालमार्फत आफूलाई एक वर्षअघि सागर लम्सालले बलात्कार गरेको आरोप लगाउँदै स्टाटस सार्वजनिक गरेकी थिइन्। सोही घटनालाई ध्यानमा राख्दै निर्माण पक्षले आकस्मिक बैठक बसेर उक्त निर्णय गरेको जनाएको छ।
विज्ञप्तिअनुसार सागर लम्साल चलचित्र ‘पाँच पाण्डव’को एक प्रमुख भूमिकामा आबद्ध थिए र झापा आसपासमा चैत २ गतेदेखि भइरहेको छायांकनमा उनको करिब ९० प्रतिशत दृश्य खिचिसकिएको थियो। तर अबदेखि ती दृश्यहरू चलचित्रमा समावेश नगरिने र आवश्यक परे पुनः छायांकन गरिने निर्माण पक्षले स्पष्ट पारेको छ।
निर्माण पक्षले कलाकारलाई परियोजनाबाट हटाउनु पर्दा र पुनः छायांकन गर्नुपर्ने अवस्थाका कारण आर्थिक क्षति हुने भए पनि पीडितको पीडाभन्दा ठूलो नहुने उल्लेख गरेको छ। साथै घटनाको सत्यतथ्य छानबिन गरी निष्पक्ष अनुसन्धान गर्न जोडदार मागसमेत गरिएको छ।
चलचित्रका प्रस्तुतकर्ता नवीन श्रेष्ठले पनि विज्ञप्तिमार्फत जघन्य अपराधको आरोप लागेका व्यक्ति कुनै पनि हालतमा फिल्मको हिस्सा बन्न नसक्ने बताएका छन्। उनले कानुनी प्रक्रिया आफ्नै ढंगले अघि बढ्ने भए पनि नैतिक रूपमा प्रश्न उठिसकेपछि जोखिम न्यूनीकरणका लागि निर्णय गरिएको स्पष्ट पारेका छन्।
निर्माण पक्षले यस प्रकरणले फिल्म निर्माणमा चुनौती थपिए पनि सामाजिक उत्तरदायित्वलाई प्राथमिकतामा राखेर निर्णय गरिएको जनाएको छ।
