काठमाडौं । पहिलो पटक शहीद स्मारक ए डिभिजन लिगले अन्तर्राष्ट्रिय प्रायोजक पाएको छ । २०७६ सालको लिगका लागि अखिल नेपाल फुटबल संघ एन्फाले कतार एयरवेजसँग सम्झौता गरेको हो ।
एक वर्षको लागि १ करोड ७० लाख रुपैयाँमा उक्त लिग सम्झौता भएको हो । प्रायोजनको रकम दुई किस्तामा उपलब्ध हुने अखिल नेपाल फुटबल संघले जनाएको छ ।
एन्फाले सबै ए डिभिजन क्लबलाई लिग तयारी खर्चवापत २० लाख रुपैयाँ दिने भएको छ । यसवर्ष ५ जना उत्कृष्ट खेलाडीलाई मोटरसाइकलको सट्टा नगद दिन लागिएको छ । उत्कृष्ट खेलाडीले अब जनही १ लाख ५० हजार रुपैयाँ पाउने भएका छन् ।
लिगका लागि क्लबले ४ जना विदेशी खेलाडी राख्न पाउनेछन् । जसमा एक जना दक्षिण एसियाली देशको हुनुपर्नेछ । चार जना विदेशी खेलाडी एकै पटक खेलाउन पाउने एन्फा अध्यक्ष कर्मा छिरिङ शेर्पाले जानकारी दिए । क्लबले १८ देखि ४५ वर्षभित्रका खेलाडी मात्र दर्ता गराउने पाउनेछन् ।
लिगको उद्घाटन खेल मछिन्द्र र बिग्रेड ब्वाइजबीच हुनेछ । दशरथ रंगशालामा खेल हेर्न साधारण प्याराफिटमा २ सय र भीआईपी प्यारापिटका लागि ५ सय रुपैयाँ टिकट शुल्क तोकिएको छ ।
