काठमाडौं । बालेन शाह नेतृत्वमा बन्न लागेको नयाँ सरकारको मन्त्रिपरिषद् गठन प्रक्रिया तीव्र बनेको छ। रवि लामिछाने नेतृत्वको राष्ट्रिय स्वतन्त्र पार्टी (रास्वपा) ले आफ्नो भागमा पर्ने मन्त्रीहरूको नाम टुंग्याउने चरणमा पुगेको स्रोतले जनाएको छ।
स्रोतका अनुसार अर्थ मन्त्रालयको जिम्मेवारी डा. स्वर्णिम वाग्ले लाई दिने लगभग निश्चित भइसकेको छ भने परराष्ट्र मन्त्रीमा शिशिर खनाल को नाम तय गरिएको छ। यस्तै, कानुन मन्त्रालयको नेतृत्व सोविता गौतम ले सम्हाल्ने गरी सहमति जुटेको बताइएको छ।
यसैबीच सम्भावित मन्त्रीहरूको विस्तारित सूचीमा सुदन गुरुङ, बिराजभक्त श्रेष्ठ, सस्मित पोखरेल, गणेश पौडेल, विक्रम खनाल, निशा डाँगी, गीता चौधरी र सीता बादी लगायतका नाम पनि चर्चामा रहेका छन्। यद्यपि ती नामहरू औपचारिक रूपमा पुष्टि भइसकेका छैनन्।
मन्त्री बन्ने सम्भावित व्यक्तिहरूलाई सभापति लामिछाने, बालेन शाह तथा उनको सचिवालयमार्फत फोन र सन्देश (एसएमएस) पठाई जानकारी दिइसकिएको स्रोतको दाबी छ।
आज दिउँसो करिब साढे १२ बजे बालेन शाहले प्रधानमन्त्री पदको शपथ लिने कार्यक्रम तय भएको छ। त्यसलगत्तै मन्त्रीहरूको पनि शपथ ग्रहण गराइने तयारी रहेको छ।
