स्पेनिस ला लिगा फुटबलमा बार्सिलोना र रियल म्याड्रिडबीच सिजनको पहिलो एल क्लासिको भिडन्त आज (बुधबार) राति हुँदैछ । यसअघि अक्टोबर २६ का लागि तय भएको एल क्लासिको क्याटलोनिया आन्दोलनका कारण स्थगित भएको थियो । क्याटलोनिया स्वतन्त्रतालाई लिएर बार्सिलोनामा लामो समयदेखि विरोध प्रदर्शन हुँदै आएको थियो । त्यतिवेला अप्रिय घटना हुने डरले स्पेनिस फुटबल महासंघले स्थगित गरेको खेल अहिले महासङ्घनै निर्देशनमा पुनः बार्सिलोनाको घरेलु मैदानमा हुन लागेको हो ।

खेललाई मध्यनजर गरी बार्सिलोनाको सुरक्षा व्यवस्था कडा पारिएको छ । रियलका प्रशिक्षक जिनेदिन जिदानले दर्शकले दुई प्रतिस्पर्धी टोलीबीच राम्रो फुटबल हेर्न चाहेको बताएका छन् । जिदानले रियलको ध्यान मैदानमा केन्द्रित रहने पनि बताए । ‘हामी सम्पूर्ण शक्ति मैदानमा लगाउनेछौँ । बार्सिलोना बलियो छ । हामीसँग पनि राम्रा हतियार छन्,’ जिदानले भने । रियललाई एल पछिल्ला खेलमा लियोनेल मेस्सी पन्छाउन निकै कठिन परिरहेको अवस्था छ ।

बार्सिलोनाका प्रशिक्षक अर्नेस्टो भालभर्डेले पनि बार्साको सम्पूर्ण ध्यान राम्रो फुटबल खेल्नमा केन्द्रित हुने बताए । ‘मैदानको ९० मिनेट हामीलाई कुनै राजनीतिले छुने छैन । शतप्रतिशत दिएर नतिजा निकाल्नु हाम्रो कर्तब्य हो,’ भालभर्डेले भनेका छन् । यसपटक ला लिगामा बार्सिलोना र रियलको अंकतालिका संयोग पनि अनौठो बनेको छ । दुवै टोलीले १६ खेलबाट समान ३५ अंक बनाएका छन् । बार्सिलोना गोलअन्तरका आधारमा शीर्ष र रियल दोस्रो स्थानमा छ ।