रुपन्देही । झण्डै एक लाख किसानलाई प्रत्यक्ष फाइदा पुर्याएर किसानका लागि उन्नत बीउबिजन कार्यक्रम परियोजना समाप्त भएको छ । परियोजनाद्वारा मङ्गलबार बुटवलमा आयोजित समापन कार्यक्रममा ग्रामीण परिवारको आयआर्जन बढाउन कार्यक्रम सफल भएको जानकारी दिइयो ।
कृषि विकासका लागि अन्तरराष्ट्रिय कोषको आर्थिक सहयोगमा कृषि तथा पशुपक्षी विकास मन्त्रालले गुणस्तरीय बीउबिजनको वितरण तथा कृषि व्यावसायीकरणका माध्यमबाट कृषकको जीवनस्तर उकास्न प्रदेश नं ५ का रुकुमपूर्व, प्यूठान, रोल्पा, गुल्मी, अर्घाखाँची गरी पाँच जिल्ला र प्रदेश ६ को रुकुमपश्चिम र सल्यान मा २६९ उपआयोजना सञ्चालन गरेको थियो ।
कार्यक्रममा प्रदेश ५ का भूमि व्यवस्था, कृषि तथा सहकारीमन्त्री आरती पौडेलले प्रदेशको कृषि उत्पादन बढाउन किसानलाई अनुदान कार्यक्रम ल्याइएको बताउनुभयो । उहाँले बीउबिजन कार्यक्रमले शुरुआत गरेका राम्रा कामलाई प्रदेश सरकारले निरन्तरता दिने जनाउँदै किसानको हितका लागि कृषि कार्यक्रम सञ्चालन गर्ने उल्लेख गर्नुभयो ।
प्रदेश सरकारले कृषक पाठशाला सञ्चालन गर्न लागेको सो अवसरमा जानकारी दिइएको थियो । कार्यक्रममा भूमि व्यवस्था, कृषि तथा सहकारी मन्त्रालयका सचिव तेजबहादुर सुवेदीले परियोजना सकिए पनि किसानको हितमा भएका कार्यक्रमले निरन्तरता पाउने जानकारी दिनुभयो । कार्यक्रमका व्यवस्थापक कौशलकुमार पौडेलले औपचारिक बीउबिजन क्षेत्रको विस्तार, साना पशुपालन किसानको व्यावसायीकरण तथा स्थानीय उद्यमशीलता एवं संस्थागत विकासको माध्यमद्वारा ग्रामीण कृषकको आयस्तर वृद्धि गर्न कार्यक्रम सफल रहेको दाबी गर्नुभयो ।
उहाँले कार्यक्रमको उद्देश्यअनुसार तरकारी, बीउ उत्पादन, नश्ल सुधार, आहार व्यवस्थापन, पशु स्वास्थ्यमा सुधार, बाख्रा एवं दुग्धजन्य क्षेत्रको विकासमा उल्लेख्य सफलता हासिल गरेको बताउनुभयो । कार्यक्रममा रोल्पा जिल्ला समन्वय समितिका संयोजक राजबहादुर बुढा, प्यूठान उद्योग वाणिज्य सङ्घका अध्यक्ष केदारमान कक्षपती, भूमि व्यवस्था कृषि तथा सहकारी मन्त्रालय प्रदेश नं ५ का वरिष्ठ कृषि विकास अधिकृत विनोद घिमिरे, सुधीर थापालगायतले किसानको जीवनस्तर सुधारमा कार्यक्रमले महत्वपूर्ण भूमिका निर्वाह गरेको बताउनुभयो । कार्यक्रममा १९ विभिन्न जिल्लाका उत्कृष्ट अनुदानग्राहीलाई सम्मान तथा नगदसहित पुरस्कृत गरिएको थियो ।
