काठमाडौँ । नवनिर्वाचित राष्ट्रिय सभा सदस्यहरूले संघीयता र समावेशीतालाई अझ मजबुत बनाउने गरी संसदमा सक्रिय भूमिका निर्वाह गर्ने प्रतिबद्धता व्यक्त गरेका छन्।
सोमबार राष्ट्रिय सभा सदस्य पद तथा गोपनीयताको शपथ ग्रहणपछि सञ्चारकर्मीहरूसँग कुरा गर्दै नेपाली कांग्रेसका सांसद सुनिल थापा, नेकपा (एमाले)की सांसद रामकुमारी झाँक्री तथा लोकतान्त्रिक समाजवादी पार्टीका सांसद महन्थ ठाकुरले संसदमार्फत प्रभावकारी कानून निर्माण र सुशासन प्रवर्द्धनमा आफूहरू केन्द्रित हुने बताएका हुन्।
कांग्रेसका सांसद सुनिल थापाले मुलुकमा सुशासन स्थापना र भ्रष्टाचार नियन्त्रण अहिलेको प्रमुख एजेन्डा भएको उल्लेख गर्दै त्यसलाई कार्यान्वयन गर्ने खालका कानून निर्माणमा आफूहरू केन्द्रित हुने बताए। उनले संसदलाई थप सक्रिय बनाउँदै देशलाई निकास दिने कानूनी व्यवस्था निर्माणमा जोड दिने धारणा राखे। उनका अनुसार संघीयता र समावेशितालाई संस्थागत रूपमा बलियो बनाउने गरी विधेयकहरू अघि बढाइनेछ।
एमालेकी सांसद तथा पूर्वमन्त्री रामकुमारी झाँक्रीले राष्ट्रिय सभाको जिम्मेवारी, अधिकार र दायित्वलाई ध्यानमा राखेर आफूले सावधानीपूर्वक काम गर्ने बताइन्। उनले सांसदको जिम्मेवारीलाई गम्भीरतापूर्वक लिएको उल्लेख गर्दै संविधानले दिएको अधिकार क्षेत्रभित्र रहेर संसदमार्फत देशलाई निकास दिने दिशामा काम गर्ने धारणा व्यक्त गरिन्।
लोकतान्त्रिक समाजवादी पार्टीका सांसद महन्थ ठाकुरले सांसदहरूको काम प्रत्यक्ष विकास निर्माण गर्ने नभएको भन्दै त्यससम्बन्धी प्रश्नहरू सोधेर अलमल्याउन नहुने बताएका छन्। उनले सांसदको हैसियतमा पाएको जिम्मेवारीलाई इमानदारीका साथ पूरा गर्ने प्रतिबद्धता व्यक्त गरे।
हाल राष्ट्रिय सभामा १८ जना नवनिर्वाचित सांसदहरूले शपथ ग्रहण गरिसकेका छन्।
