काठमाडाैँ । निर्वाचन आयोगले समानुपातिक मतगणना पनि तीब्रता दिएको छ, करिव ३ लाख मतगणना भइसकेको आयोगले जानकारी दिएको छ।
शनिबार न्युज एजेन्सी नेपालसँगको संवादमा आयोगका सहायक प्रवक्ता कुलबहादुर जिसीले मतदानका क्रममा कति मत बदर भएको भन्ने विषय आमचासोको विषय भएको बताए। उनले भने, “अझै मत गणना बाँकी भएकाले अहिले नै बदर मतको यकिन तथ्याङ्क दिन सकिँदैन। केही स्थानबाट छिटपुट विवरण आइरहेको भए पनि एकमुष्ट तथ्याङ्क आउन बाँकी छ।”
जिसीका अनुसार कतिपय निर्वाचन क्षेत्रमा मतदाताहरू भोट हाल्नै नआएको र केही ठाउँमा अत्यन्त कम प्रतिशत मतदान भएको देखिएको छ। साथै, कतिपय मतपत्रमा कुनै चुनाव चिन्हमा सङ्केत नगरी खाली राखिएका मतपत्रहरू स्वतः बदर मानिने कानूनी व्यवस्था छ।
उनले थपे, “अहिलेसम्म मतगणना भएको विवरण र बदर मतको संख्या यकिन भएको छैन। सबै निर्वाचन क्षेत्रको नतिजा आएपछि मात्र सदर र बदर मतको कुल संख्या निकाल्न सकिन्छ र त्यसपछि बदर मतको प्रतिशत निश्चित गर्न सकिन्छ।”
निर्वाचन आयोगले प्रत्यक्षतर्फको नतिजा आउँदै गरेको क्रममा समानुपातिक मतगणनालाई पनि सँगसँगै अगाडि बढाइरहेको बताउँदै सम्पूर्ण नतिजा छिट्टै सार्वजनिक हुने जनाएको छ।
