काठमाडौँ: कोइराला परिवारको गृहनगर विराटनगर भएकाले पनि मोरङ जिल्ला काठमाडौँपछिको चर्चित र बढी निर्वाचन क्षेत्र रहेको जिल्ला हो ।
त्यसैले पहिले पहिले नेपाली कांग्रेसका सभापति गिरिजाप्रसाद कोइराला उठ्ने भएकाले र अहिले उनको विरासतमा रहेका डा शेखर कोइरालाका कारण प्रतिनिधिसभाको निर्वाचनमा मोरङ्को राम्रै चर्चा हुने गर्दछ ।
यतिबेला पनि चर्चा त्यस्तै थियो डा शेखर, मिनेन्द्र रिजाल र काठमाडौँमा पनि चर्चित डा सुनिल शर्माका कारण । तर निर्वाचनको मतगणना जारी रहँदा मोरङका सबै ६ वटा निर्वाचन क्षेत्रमा राष्ट्रिय स्वतन्त्र पार्टी (रास्वपा) का उम्मेदवारहरू भारी मतान्तरसहित अगाडि छन् ।
पहिलेका निर्वाचनहरुमा परम्परागत रूपमा कांग्रेसको बलियो आधार क्षेत्र मानिने गरिएको यो जिल्लामा यसपटक भने रास्वपा क्लिन स्विपको बाटोमा अघि बढेको छ ।
कोइराला परिवारको लामो राजनीतिक विरासत बोकेको मोरङमा यसपटक कांग्रेसका प्रभावशाली उम्मेदवारहरू नै फराकिलो मतान्तरसहित पछाडि देखिएका छन्।
मोरङ निर्वाचन क्षेत्र नम्बर १ मा रास्वपाका यज्ञमणि न्यौपाने १० हजार भन्दा बढी मतसहित अग्रस्थानमा छन् । उनलाई श्रम संस्कृति पार्टीकी शान्ति पाख्रिन लामाले पछ्याइरहेकी छन् । यहाँ कांग्रेसका खड्गबहादुर फागो तेस्रोमा छन् ।
त्यस्तै मोरङ–२ मा रास्वपाका कृष्णकुमार कार्की ११ हजार ४२४ मतसहित अग्रस्थानमा छन् । उनलाई एमालेका दिलीपकुमार अग्रवालले पछ्याएका छन् ।
कांग्रेसका प्रभावशाली नेता मिनेन्द्र रिजाल यहाँ तेस्रो स्थानमा छन् । त्यस्तै मोरङ–३ मा पनि रास्वपाका गणेश कार्की नै ४ अग्रस्थानमा छन् । उनलाई श्रम संस्कृति पार्टीका अमिर मगरले ३ हजार ७६८ मतसहित पछ्याइरहेका छन्।
यस क्षेत्रमा कांग्रेसका सुनिल शर्मा तेस्रो स्थानमा छन् । त्यस्तै मोरङ–४ मा रास्वपाका सन्तोष राजवंशी विजय भैसकेका छन् । उनले कांग्रेसका महामन्त्री गुरूराज घिमिरेसँग उनको धेरै ठूलो मतान्तर रहेको छ ।
त्यस्तै मोरङ–५ मा रास्वपाकी आशा झा अग्रस्थानमा छिन् । यहाँ उनलाई जनता समाजवादी पार्टी नेपालका राजकुमार यादवले पछ्याएका छन् । भने कांग्रेसका फुलकुमार लालवानी तेस्रो स्थानमा छन् ।
