काठमाडौँ। निर्वाचन आयोगले आज सम्पन्न प्रतिनिधिसभा सदस्य निर्वाचनमा करिब ६० प्रतिशत मत खसेको प्रारम्भिक अनुमान गरेको छ।
निर्वाचनपछि आयोगमा आयोजित पत्रकार सम्मेलनमा कार्यबाहक प्रमुख आयुक्त रामप्रसाद भण्डारीले अहिलेसम्म प्राप्त विवरणअनुसार करिब ६० प्रतिशत मतदान भएको जानकारी दिए।
उनले विस्तृत विवरण सङ्कलन जारी रहेको उल्लेख गर्दै छिटपुट घटनाबाहेक देशभर मतदान शान्तिपूर्ण र उत्साहजनक रूपमा सम्पन्न भएको राष्ट्रिय तथा अन्तर्राष्ट्रिय पर्यवेक्षक संस्थाहरूको प्रारम्भिक प्रतिवेदनले देखाएको बताए।
दुर्गम १५ जिल्लाका मतपेटिका नेपाली सेनाको हेलिकोप्टरमार्फत सङ्कलन गरिने र त्यसपछि मतगणना तुरुन्त सुरु गरिने कार्यबाहक प्रमुख भण्डारीले जानकारी दिए। उनका अनुसार ताप्लेजुङ, रसुवा, दोलखा र रुकुमपूर्वका मतपेटिका आजै सङ्कलन गरिनेछ भने सङ्खुवासभा, सोलुखुम्बु, मनाङ, हुम्ला, रुकुमपश्चिम र बाजुराका मतपेटिका शुक्रबारसम्म हेलिकोप्टरमार्फत ल्याइनेछ।
आयोगले मतदाताले प्रतिनिधि छान्ने र शासन सञ्चालन प्रक्रियामा सहभागी भएर सहयोग गर्ने सबैलाई धन्यवाद व्यक्त गरेको छ। कतिपय स्थानमा मतदाताले मतदानमा सहभागी नभएको बारेमा कार्यबाहक प्रमुख भण्डारीले सरकार वा जनप्रतिनिधिले गरेका प्रतिबद्धता पूरा नहुँदा मत नदिएको हुनसक्ने भए पनि ती मतदाताले संविधान, प्रणाली वा आयोगप्रति असन्तुष्ट नभएको स्पष्ट पारे ।
