काठमाडौँ । राष्ट्रिय सभाको १९ औँ अधिवेशन समापनका क्रममा विभिन्न राजनीतिक दलका सांसदहरूले प्रतिनिधि सभा सदस्य निर्वाचनबारे आशंका व्यक्त गरेका छन् ।

अधिवेशनको उपलब्धि, छोटो समयमा भएका कामहरू र आगामी फागुन २१ गते हुने प्रतिनिधि सभा निर्वाचनको वातावरणबारे आफ्ना धारणा राख्दै उनीहरुले आसन्न निर्वाचनको निष्पक्षतामाथि प्रश्न गरेका हुन् । सांसदहरूले यो छोटो अवधिमा अधिवेशन सफल भएको बताएका छन् । नेपाली कम्युनिष्ट पार्टीका सांसद वेदुराम भुसालले ७ वटा कार्य बैठकमा ३ विधेयक पारित, ३ अध्यादेश स्वीकृत, केही प्रतिवेदन प्रश्तुत र प्रश्नोत्तर कार्यक्रम सम्पन्न भएको उल्लेख गर्दै छोटो समयमा यति काम विगतमा कमै भएको बताउनु भयो । उहाँले यसलाई सकारात्मक रूपमा लिनुभयो ।

नेपाली काँग्रेसका सांसद कृष्णबहादुर रोकायाले ९ वटा बैठक (शोक प्रश्तावसहित) मा ३ विधेयक पारित, एउटा फिर्ता, अध्यादेशहरू स्वीकृत र समितिका प्रतिवेदनहरू पारित भएको बताउनु भयो । उहाँले यो अधिवेशनले संविधान जीवित रहेको र राष्ट्रिय सभाको गरिमा बढाएको सन्देश दिएको उल्लेख गर्नुभयो । नेकपा (एमाले) का सांसद गोपालप्रसाद भट्टराईले ९ वटा बैठकमा ३–४ विधेयक पारित भएको र समितिमा मेहनत गरेको बताउनु भयो । उहाँले विषम परिस्थितिमा पनि सदन सञ्चालन भएको र सहकार्य कायम राख्न आग्रह गर्नुभयो । राष्ट्रिय जनमोर्चाका सांसद तुलप्रसाद विश्वकर्माले पनि छोटो समयमा धेरै काम भएको स्वीकार गर्दै अन्य अधिवेशनभन्दा तुलनात्मक रूपमा राम्रो भएको बताउनु भयो ।

निर्वाचनको वातावरणप्रति चिन्ता र सरकारलाई आग्रह

सबै सांसदहरूले फागुन २१ गते हुने प्रतिनिधि सभा निर्वाचनको वातावरण चिन्ताजनक रहेको बताउनुभएको छ । भुसालले शान्तिपूर्ण, निष्पक्ष, धाँधलीरहित र भयमुक्त वातावरणमा निर्वाचन होस् भनी सरकारलाई मेहनत गर्न आग्रह गर्नुभयो । रोकायाले असामान्य परिस्थितिमा निर्वाचन भएको उल्लेख गर्दै निष्पक्ष र धाँधलीरहित बनाउन सरकारसँग माग गर्नुभयो । उहाँले सरकारका केही सदस्यहरू हतारमा निर्वाचन लड्न लागेको र दायित्व पूरा नगरेको आरोप लगाउनु भयो । साथै परिणामले राजनीतिक संकटको निकास दिनुपर्ने बताउनु भयो । भट्टराईले निर्वाचन निष्पक्ष हुने सङ्केत नभएको दाबी गर्दै भ्रष्टाचार मुद्दा फिर्ता लिने प्रयास, जेल ब्रेक, हतियार लुट, प्रहरीको मनोबल गिरेको, सामाजिक सञ्जाल अनियन्त्रित र आचारसंहिता उल्लङ्घनका घटनाहरू (जस्तै समाज कल्याण परिषद्बाट कर्मचारी निकाल्ने) उठाउनु भयो । उहाँले सरकारलाई २० दिनभित्र निष्पक्षताको सन्देश दिन ध्यानाकर्षण गर्नुभयो ।

विश्वकर्माले भयमुक्त वातावरण नहुने शङ्का व्यक्त गर्दै हतियार भेटिने, अपराधी जेलबाहिर, राष्ट्रियता सङ्कटमा परेको, विदेशी शक्तिको चलखेल (इण्डो–प्यासिफिक, चीनको धम्की), एमसीसी, पपुलिस्ट राजनीति, हिन्दु राज्य/राजतन्त्रको माग र क्रिस्चियन मिसनरी गतिविधि जस्ता विषय उठान गर्नुभयो । उहाँले सरकारलाई निष्पक्ष निर्वाचन गराउन र आगामी सरकारलाई राष्ट्रियता/संविधान संरक्षण गर्न आग्रह गर्नुभयो ।

सांसदहरूले अधिवेशनको कार्यसम्पादनलाई सकारात्मक ठाने पनि आगामी निर्वाचनको शान्ति, निष्पक्षता र धाँधलीरहितताप्रति गम्भीर चिन्ता व्यक्त गर्नुभएको छ । सबै दललाई एकतावद्ध भएर संविधान र लोकतन्त्र मजबुत बनाउन आह्वान गर्नुभएको छ । मतदाताले भयमुक्त वातावरणमा मतदान गर्न पाउने सुनिश्चितता खोजेको बताउनु भयो ।

राजनीतिक निकास कि थप अन्योल ?

नेपाली काँग्रेसका सांसद कृष्णबहादुर रोकायले निर्वाचनलाई ‘असामान्य परिस्थितिको उपज’ भन्दै यसले वर्तमान राजनीतिक सङ्कट समाधान गर्छ कि गर्दैन भन्नेमा आशङ्का व्यक्त गर्नुभयो। । सरकारमा रहेका व्यक्तिहरू नै स्वार्थको द्वन्द्व हुने गरी निर्वाचनमा होमिँदा विश्वसनीयतामा संकट आउने उहाँको विश्लेषण छ ।

राष्ट्रियता र व्यवस्थामाथिको थ्रेट

राष्ट्रिय जनमोर्चाका सांसद तुलप्रसाद विश्वकर्माले भने निर्वाचनभन्दा ठूलो खतरा राष्ट्रियता र संघीयताको बोझमा रहेको औंल्याउनु भयो । वैदेशिक चलखेल, एमसीसीको रणनीतिक प्रभाव र ‘पपुलिस्ट’ राजनीतिको उदयले गणतन्त्र र संविधान नै जोखिममा परेको उहाँको भनाइ छ ।