काठमाडौं । म्यानचेस्टर डर्बीमा अन्तरिम प्रशिक्षक माइकल क्यारिकको नेतृत्वमा म्यानचेस्टर युनाइटेड प्रभावशाली देखिएको थियो र उनीहरूको जित पूर्ण रूपमा योग्य रहेको विश्लेषक क्रिस सटनले बताएका छन्।
क्यारिकले उक्त प्रदर्शन र नतिजालाई निरन्तरता दिने विषयमा कुरा गरेका छन्। यद्यपि, युनाइटेडले फेरि राम्रो खेल खेले पनि एमिरेट्स रंगशालामा गएर आर्सनलविरुद्ध अंक निकाल्नु निकै कठिन हुने सटनको ठम्याइ छ।
पछिल्लो प्रिमियर लिग खेलमा आर्सनलले नटिङ्घम फरेस्टविरुद्ध अंक गुमाए पनि त्यो सप्ताहन्त उनीहरूका लागि समग्रमा सकारात्मक नै रहेको सटनले उल्लेख गरेका छन्। उनका अनुसार यसपटक मिकेल आर्टेटाको टोली चुक्ने सम्भावना कम छ।
‘क्यारिक प्रभाव’ कति समय टिक्छ भन्ने हेर्न रोचक हुने सटनको भनाइ छ। तर आर्सनलले टोलीमा केही परिवर्तन गरे पनि अन्ततः उनीहरू नै जित निकाल्न सक्षम हुने विश्वास उनले व्यक्त गरेका छन्।
क्यारिकले म्यानचेस्टर सिटीविरुद्ध खेल्दा अपनाएको रणनीति सफल भएको थियो। आर्सनलविरुद्ध खुला खेलमा रोक्ने कुनै योजना उनले बनाउन सक्लान्, तर युनाइटेडका लागि सेट–पिसहरू अझै ठूलो चुनौती रहने सटनको विश्लेषण छ।
क्रिस सटनको भविष्यवाणी अनुसार उक्त खेलमा आर्सनलले म्यानचेस्टर युनाइटेडलाई २–० ले पराजित गर्ने सम्भावना छ।
खेल समयः राति १०ः१५ बजे
