जनकपुरधाम । प्रदेश–२ की भौतिक पूर्वाधार विकास राज्यमन्त्री डा. डिम्पल झाले राजीनामा दिएकी छन् । सरकार परिवर्तन हुने चर्चा चलिरहेकै बेला राष्ट्रिय जनता पार्टीबाट मन्त्री बनेकी झाले राजीनामा दिएकी हुन् । राज्यमन्त्री झाले आफू सरकारको कामदेखि सन्तुष्ट नरहेकाले राजीनामा दिएको बताइन् । ‘प्रदेश सरकारमा राज्यमन्त्रीको हैसियत, पदीय मर्यादा र पदको प्रतिष्ठा जोगाउन लामो समयदेखिको मेरो प्रयासका बाबजुद पनि स्थिति अनूकुल हुने अवस्था नरहेकोले राज्यमन्त्री पदबाट राजीनामा गरेको छु’, उनले राजीनामा भनेकी छन् ।
राजपाका अध्यक्ष मण्डलका सदस्य अनिल झाकी श्रीमति रहेकी उनले उपभोक्तालाई रकम दिन नसकेकोमा असन्तुष्टि पोख्दै आएकी थिइन् । उनले भनिन्, ‘धेरै दिनदेखि उपभोक्ता समितिहरूको पैसा राखेको छ । मानिसहरू हामीलाई फोन गर्छन, हाम्रो पैसा किन रोकियो भनेर ? क्याविनेट पैसा दिन पास गरे पनि अहिलेसम्म पैसा दिइएको छैन ।’ सरकारमा मुकदर्शक बनेर रहनेबाहेक कुनै काम नरहेकाले असन्तुष्ट भएर राजीनामा दिएको उनले बताइन् ।
मुख्यमन्त्रीले एकलौटी रूपमा प्रदेश सरकारले काम गरिरहेको आरोपसमेत झाले लगाइन् । अब सांसद रहेरै काम गर्ने उनले बताइन् । राजीनामाबारे मुख्यमन्त्रीलाई औपचारिक रूपले उनले जानकारी गराएकी छन् भने राजीनामापत्र राजपा संसदीय दलका अध्यक्ष जितेन्द्र सोनललाई बुझाएकी छन् । राज्यमन्त्रीहरू आफूहरू कामविहीन रहेको भन्दै गुनासो गर्दै आएका छन् । सौर्य दैनिकबाट
