काठमाडौँ । चिसो मौसमको सुरुवात भएसँगै सडकआश्रित मानवहरुको उद्धार गर्दै आइरहेको मानवसेवा आश्रमले सडकआश्रित मानवहरुको उद्धारका लागि मेची महाकाली यात्रा २०७८ को थालनी गरेको छ । यात्रा पौष १५ गते सुरु भई माघ ५ गते सम्पन्न हुनेछ ।
यस अघि २०७७ साल पौष ९ गतेदेखि माघ १६ गतेसम्म मानवसेवा आश्रमले पूर्वको मेचीदेखि पश्चिमको महाकालीसम्मका सडकमा रहेका सहयोगापेक्षी (बेसहारा, अशक्त, असहाय, अनाथ, अभिभावकविहीन, मानसिक तथा शारीरिक रुपमा कमजोर) ७५८ जना मानवहरुको उद्धार गरेको थियो ।
मानवसेवा आश्रमले यसपालिको यात्रा ३ वटा उद्धेश्य राखेर गर्न लागेको मानवसेवा आश्रमका परिकल्पनाकार एवं संस्थापक रामजी अधिकारीले बताउनु भयो।
सडकपेटी र सार्वजनिक स्थलमा रहेका कष्टपूर्ण जीवनयापन गर्न बाध्य भएका सहयोगापेक्षी व्यक्तिहरुको उद्धार गर्ने कार्य यात्राको पहिलो उद्धेश्य रहने अधिकारीले बताउनु भयो ।
“मानवसेवा आश्रमले विगत १० बर्षदेखि नै जसका कोही छैनन्, जसको केही छैन, उनैको सेवामा समर्पित भन्ने आदर्शलाई आत्मसाथ गरेर सडकमानवहरुको उद्धार, उपचार, परामर्श र संरक्षण गर्दै आइरहेको छ ।”
यसपल्टको यात्रा अघिल्लो पटकको भन्दा केही परिमार्जित हुने समेत अधिकारीले बताउनु भयो । “अघिल्लो पटकको यात्रामा हामी आफैले सडकआश्रितको उद्धार ग¥यौँ जसले गर्दा जानकार हुनुपर्ने स्थानीय निकायहरुलाई सडकमानवको अवस्था बारे बुझाउन सकेनौँ जस्तो लाग्छ । यस पटकको यात्रामा भने सडकमानव भेटिएको स्थानमा स्थानीय जनप्रतिनिधि र प्रहरीसँग समन्वय गरेर उद्धार गरिनेछ ।”
दातृ निकायहरुको सर्त सहितको सहयोग स्वीकार नगरि परोपकारी मानवताप्रेमीहरुको विवाह वर्षगाँठ, जन्मदिन, ब्रतबन्ध, पुजापाठ वा पितृ स्मरणहरुको कार्यक्रम एवं स्वेच्छिक सहयोगबाट सञ्चालन भइरहेको मानवसेवा आश्रमको नियमित गास व्यवस्थापनका लागि मेची महाकाली यात्राकै क्रममा भजन सन्ध्याको समेत आयोजना हुने छ ।
मानवसेवा आश्रम दान दातव्यबाट सञ्चालन भएको संस्था भएकोले सम्पूर्ण सहयोगी दाताहरुलाई आर्थिक बर्ष २०७७र०७८ को आयव्यय विवरण र प्रगति प्रतिवेदन सार्वजनिक गर्ने कार्यक्रम समेत रहने छ ।
