धनगढी । कञ्चनपुरको जोगबुढा नदीमा फसेको बाघको करिब दुई महिनाको बच्चा (डमरू)को समयमै उद्धार नहुँदा मृत्यु भएको छ।
दोधारा चाँदनी नगरपालिका–१ स्थित चाँदनी गैरीशंकर सामुदायिक वन नजिक बुधबार बिहान हिलो र पानीमा फसेको अवस्थामा डमरू भेटिएको थियो। स्थानीयले डिभिजन वन कार्यालय र शुक्लाफाँटा राष्ट्रिय निकुञ्जलाई खबर गरे पनि उद्धारमा ढिलाइ भएको आरोप लगाएका छन्।
डिभिजन वन कार्यालय कञ्चनपुरका प्रमुख सुरेशचन्द्र डिसीले निकुञ्ज र राष्ट्रिय प्रकृति संरक्षण कोषको लापरवाहीका कारण मृत्यु भएको दाबी गरे। उता, शुक्लाफाँटा राष्ट्रिय निकुञ्जका प्रमुख संरक्षण अधिकृत चन्द्रशेखर चौधरीले चिकित्सकसहितको टोली समयमै पुगेको र माउ बाघ वरपर भएकाले माउले नै बच्चा लैजाओस् भनेर प्रतीक्षा गरिएको बताए।
अत्यधिक चिसो, हिलो र पानीमा लामो समय फसेकाले डमरुको मृत्यु भएको आरोप छ ।
निकुञ्जका अनुसार प्रतीक्षाकै क्रममा डमरूको मृत्यु भएको हो। शुक्लाफाँटा राष्ट्रिय निकुञ्जमा हाल ४४ बाघ संरक्षित छन्।
