हेटौँडा । रसुवामा आएको बाढीबाट प्रभावित नागरिकको राहत तथा उद्धारका लागि हेटौँडा स्कूल अफ म्यानेजमेन्टले प्रधानमन्त्री दैवी प्रकोप राहत कोषमा २० लाख रुपैयाँ सहयोग गरेको छ।
संस्थाका प्रिन्सिपल पुरनबहादुर जोशीले व्यक्तिगत रूपमा १५ लाख रुपैयाँ र शिक्षक तथा कर्मचारीले स्थापना गरेको कोषबाट पाँच लाख रुपैयाँ गरी कुल २० लाख रुपैयाँ राहत कोषमा दाखिला गरिएको हो।
प्रिन्सिपल जोशीले विपद्को समयमा नागरिकले आफ्नो क्षमताअनुसार सहयोग गर्नुपर्ने बताए। “राष्ट्र विपद्मा परेका बेला नागरिकले आ–आफ्नो क्षमताअनुसार सहयोग गर्नुपर्छ,” उनले भने, “राष्ट्र दुःखमा हुँदा हामी पनि सँगै छौँ भन्ने सन्देश दिन सहयोग गरेका हौँ।”
रसुवाको बाढीबाट प्रभावित नागरिकको राहत, उद्धार तथा पुनःस्थापनाका लागि मकवानपुरका विभिन्न सङ्घसंस्था, निजी क्षेत्र तथा व्यक्तिहरूले सहयोग गर्ने क्रम जारी रहेको छ।
