काठमाडौँ। उज्यालो नेपाल पार्टीले समानुपातिक तर्फको छुट्टै बन्दसूची बुझाउने तयारी थालेको छ।
राष्ट्रिय स्वतन्त्र पार्टीसँग एकताको विषयमा वार्ता भइरहे पनि अन्तिम दिन भएकाले छुट्टै सूची बुझाउने निर्णयतर्फ पार्टी अघि बढेको हो।
आइतबार बेलुका र रातिसम्म रास्वपाका सभापति रवि लामिछाने, काठमाडौँ महानगरपालिकाका मेयर बालेन शाह (बालेन्द्र) र कुलमान घिसिङबीच एकताबारे छलफल भए पनि वार्ता निष्कर्षविहीन भएको थियो।
एकताबारे थप छलफल गर्ने सहमति भए तापनि आज समानुपातिक बन्दसूची बुझाउने अन्तिम दिन भएकाले छुट्टै सूची बुझाउने तयारी गरिएको उज्यालो नेपाल पार्टीका एक नेताले जानकारी दिए।
उनका अनुसार पार्टीले आजै समानुपातिक सूची बुझाउने अन्तिम तयारी गरिरहेको छ।
