सिन्धुपाल्चोक । हिउँदे मौसम सुरुसँगै सिन्धुपाल्चोकको भोटेचौर क्षेत्रमा तोरीका बारी र हिमशृंखलाको संयोजनले मनमोहक दृश्य सिर्जना गर्ने गरेको छ ।
स्थानीय बासिन्दा र आन्तरिक पर्यटक दुवैलाई आकर्षित गर्ने यस्तो दृश्य हरेक मंसीर तीर देखिन्छ।यस क्षेत्रका खेतबारी अहिले पहेंलो रङका तोरीका फूलले ढाकिएका छन्। यसैबीच उत्तरतिर देखिने गणेश हिमाल, लाङटाङ र दोर्जे लाक्पा हिमशृंखलाले दृश्यलाई झनै आकर्षक बनाएको देखिन्छ ।
स्थानीय किसानहरूका अनुसार तोरी खेती यो क्षेत्रको परम्परागत बाली हो। तर पछिल्लो समय तोरीबारी र हिमशृंखलाको दृश्यका कारण पर्यटक बढ्दा गाउँको आर्थिक गतिविधिमा पनि थप सकारात्मक असर परेको छ।
“हिउँद सुरु भएलगत्तै यहाँ पर्यटक आउन सुरु गर्छन्, फोटो खिच्छन्, घुमफिर गर्छन्। यसले स्थानीय व्यवसायमा समेत चलायमान बढाएको छ,” एक स्थानीय बताउनु भयो ।
काठमाडौँबाट नजिकैको पुग्ने दूरीमा रहेको भोटेचौर आन्तरिक पर्यटनका लागि पनि सहज गन्तव्यका रूपमा देखिएको छ। मौसम खुलेका दिन तोरीबारी, पहाडी गाउँ र हिमशृंखलाको ‘एकै फ्रेम’ दृश्य हेर्न सकिने भएकाले हिउँदमा यो क्षेत्र विशेष लोकप्रिय बन्दै गएको छ।
काठमाडौंदेखि ३२ किलोमिटर दुरीमा रहेको भोटेचौर बौद्ध, जोरपाटी, साँखु, जर्सिङ पौवा, चौकी र धारापानी हुँदै देउराली डाँडा खोल्सापारी नगर गिरानचौर गाविस हुँदै पुग्न सकिन्छ।
