काठमाडौँ । जेन—जी आन्दोलनलाई संस्थागत गर्न निर्वाचन अपरिहार्य भएको जेनजी अभियान्ताहरुले बताउनुभएको छ ।
काठमाडौंमा शनिवार आयोजित ‘जेनजी विद्रोह र अबको बाटो’ नामका कार्यक्रममा सहभागीहरुले निर्वाचनबाट कोही भाग्न नहुनेमा जोड दिनुभयो । जेन—जी प्रतिनिधि संसाद अहमदले समाजका भएको भ्रष्टाचार, बेरोजगार, समाजिक विभेदका कारण भदौ २३ गते जेन—जी विद्रोह भएको बताउनुभयो । उहाँले जेन—जी विद्रोहलाई संस्थागत गर्ने अबको मुल बाटो नै चुनाव भएको जिकिर गर्नुभयो । निर्वाचनपछि आएको जनादेशले जेनजी आन्दोलनलाई संस्थागत गर्ने उहाँको भनाई छ । उहाँले केही जेन—जी प्रतिनिधिहरु चुनाव भाँड्न प्रयासरत रहेको उल्लेख गर्दै सबैले चुनावमा सहभागी हुनुपर्ने बताउनुभयो ।
जेन—जी प्रतिनिधि मोनिकाले नेपालमा केही गर्ने वातावरण नभएको र सामान्य जीवन बाच्नको लागि पनि विदेशीनुपर्ने स्थितिको कारण विद्रोह भएको बताउनु भयो । सत्तामा भएका व्यक्तिहरुले भ्रष्टाचार र कुशासनको माध्यमबाट सामाजिक, आर्थिक, राजनितिक र पर्यावरणीय अन्यायलाई संस्थागत गरेको उहाँको आरोप छ । सोही कारण युवाहरुमा निराशा आएको र विद्रोह भएको उहाँले बताउनु भयो ।
जेनजी प्रतिनिधिहरुले भदौ २३ मा राज्यले गरेको दमनको कारण भदौ २४ को घटना भएको बताउनुभएको छ । भदौ २४ लाई मात्रै उचालेर जेन—जीहरुको बलिदानीलाई दबाउन खोजिएको पनि उहाँहरुको आरोप छ ।
