एजेन्सी । हलिउडकी प्रसिद्ध अभिनेत्री डायन कीटनको ७९ वर्षको उमेरमा शनिबार निधन भएको छ । उनले ‘एनी हल’ र ‘द गडफादर’ जस्ता सुपरहिट फिल्महरूमा अभिनय गरेकी थिइन् ।
उनी निधन भएको समाचार सबैभन्दा पहिले पिपल म्यागजिनले सार्वजनिक गरेको थियो । त्यसपछि उनकी छोरी डेक्स्टर कीटन ह्वाइटले उक्त खबरको पुष्टि गरेकी हुन् । परिवारले सञ्चारमाध्यम र प्रशंसकहरूलाई गोपनीयता (प्राइभेसी) कायम राख्न आग्रह गरेको छ।
कीटनको मृत्यु क्यालिफोर्नियामा भएको हो । उनको मृत्युको कारण अहिलेसम्म सार्वजनिक गरिएको छैन । जानकारी अनुसार शनिबार बिहान उनको स्वास्थ्य अचानक बिग्रिएपछि उनलाई अस्पताल लगिएको थियो । बिहान करिब ८ बजेर ८ मिनेटमा एम्बुलेन्स उनको घरमा पुगेको थियो । अस्पताल पुर्याएपछि चिकित्सकहरूले उनलाई मृत घोषणा गरेका थिए ।
जानकारी अनुसार कीटन पछिल्ला केही महिनादेखि बिरामी थिइन् । उनी आफ्नो परिवारसँग बस्दै आएकी थिइन् र साथीहरूसँग दूरी बनाएकी थिइन् । उनले आफ्नो स्वास्थ्य अवस्थाबारे खुलस्त कुरा गरेकी थिइन् । उनी ‘इटिङ डिसअर्डर’ नामक समस्याबाट पीडित थिइन्, जसमा व्यक्ति आफ्ना खाने बानीहरूलाई नियन्त्रण गर्न नसक्ने समस्या हुन्छ ।
कीटनले ‘द गडफादर’ र ‘एनी हल’ बाहेक ‘म्यानहटन’, ‘द फर्स्ट वाइभ्स क्लब’, ‘बुक क्लब फ्रेन्चाइज’, ‘फादर अफ द ब्राइड’ र ‘समथिङ्स गट्टा गिभ’ जस्ता फिल्महरूमा पनि अभिनय गरेकी थिइन् ।
‘एनी हल’ फिल्मका लागि उनले उत्कृष्ट अभिनेत्रीको अस्कार अवार्ड जितेकी थिइन् । त्यसबाहेक उनलाई तीन पटक अरू फिल्महरूका लागि पनि अस्कारमा नामांकन गरिएको थियो ।
कीटनले कहिल्यै विवाह गरेकी थिइनन्, तर वुडी एलेन, वारेन बिटी र आल पाचिनोसँग उनका सम्बन्धका चर्चा रहँदै आएका थिए । उनले एक पटक भनेकी थिइन्, “म विवाहका लागि बनेकी थिइनँ। मलाई बच्चा चाहिन्थ्यो, पति होइन ।”
उनले दुई बच्चा — छोरी डेक्स्टर र छोरा ड्यूक — लाई लालनपालन लिएकी थिइन् ।
