हुक्केले आएर भन्यो
महाराज ती त हामीलाई थाहै नदिई
हिडिरहेका रहेछन् ।
ढोकेले आएर भन्यो
महाराज ती त हामीलाई थाहै नदिई
भोकै बसेका रहेछन् ।
वैठकेले आएर भन्यो
महाराज ती त हामीलाई थाहै नदिई
खुला आकाशमा सुतिरहेका रहेछन् ।
हजुरीले आएर भनी
महाराज ती त हामीलाई थाहै नदिई
घर पो जान खोजिरहेका रहेछन् ।
महाराजबाट हुकुम बक्स्यो
हामीलाई थाहै नदिई
राजमार्गमा हिड्ने ?
हामीलाई थाहै नदिई
भोकै बस्ने ?
हामीलाई थाहै नदिई
खुला आकाशमा सुत्ने ?
हामीलाई थाहै नदिई
घर जान खोज्ने ?
यी नाङ्गा, भोका, थकित, गलितहरु
खालि खुट्टा, पसिना चुहाउँदै हिड्नु
हामी विरुद्धको षडयन्त्र हो ।
द्वारे बाहिर निस्किएर चिच्यायो
महाराजवाट हुकुम भएको छ ।
देशमा कोही भोकले मर्ने छैन ।
कोही घरबारबिहिन हुनेछैन ।
कोहि रोगले मर्ने छैन ।
त्यसकारण सडकमा भोकभोकै हिड्नेहरु
सत्ता विप्लवी हुन् ।
अब देखि महाराजलाई
थाहा नदिई कुनै काम नगर्नु नगराउनु ।
हुकके, वैठके, ढोके र हजुरी खोपीमा भेला भए
महाराजलाई जानकारी गराउन,
पहिला हामीलाई जानकारी गराउनुपर्छ ।
सडकमा त उहाँ आफै गइबक्सिन्न क्यारे ?
अनि अट्टहास गरे
हा… हा…हा…हा….।
