काठमाडौँ । कप्तान रोहित पौडेलको अविजित शतकको मद्दतमा नेपालले साउथ अस्ट्रेलिया (एसए)लाई पराजित गरेको छ ।
शनिबार भएको एकदिवसीय खेलमा साउथ अस्ट्रेलियाले दिएको २४३ रनको लक्ष्य नेपालले ५ बल बाँकी छँदा ८ विकेटको क्षतिमा भेट्टाएको हो ।
नेपालका लागि कप्तान रोहित पौडेलले अविजित १०१ रनको योगदान दिए । १६१ रनमा ८ विकेट गुमाएको नेपालका लागि रोहित र सोमपाल कामीले अर्धशतकीय साझेदारी गर्दै जिततर्फ डोर्याए । सोमपाल ४० रनमा अविजित रहे ।
त्यसअघि टस हारेर पहिले ब्याटिङको निम्तो पाएको साउथ अस्ट्रेलियाले निर्धारित ४५ ओभरमा २४२ रनमा अलआउट भयो ।
साउथ अस्ट्रेलियाका लागि ह्यारी मानेन्तीले सर्वाधिक ६३ रन बनाए भने दुवित हूगानबोजमले ५३ रन जोड्दा । रायन किङले ३५ तथा म्याकेन्जी हार्भेले २४ रन बनाए ।
नेपालका लागि नन्दन यादव र सोमपाल कामीले ३–३ विकेट लिए भने सन्दीप लामिछाने, शाहब आलम र रुपेश सिंहले १–१ विकेट लिए ।
