काठमाडौं । ब्रम्हाकुमारीज एवम् समाज सेवा प्रभागले एकै दिन ५ हजार ५७ पिन्ट रगत संकलन गरेको छ । यो नेपालको इतिहासमै एकै दिन धेरै रगत संकलन भएको हो ।
ब्रह्माकुमारीज संस्थाका पूर्वमुख्य प्रशासिका राजयोगिनी दादी प्रकाशमणिको १८औं पुण्यतिथि तथा विश्व बन्धुत्व दिवसको अवसरमा रगत संकलन गरिएको हो ।
देशैभरका विभिन्न स्थानमा शिविर सञ्चालन गरी रगत संकलन गरिएको हो । एकै दिन ५ हजार ५७ पिन्ट रगत संकलन गर्दै नेपालले अभूतपूर्व कीर्तिमान कायम गरेको दाबी ब्रम्हाकुमारीज एवम् समाज सेवा प्रभागले जनाएको छ ।
प्रभागले यो केवल अंकको रेकर्ड मात्र होइन, जीवनप्रेम र सेवा–समर्पणको विराट प्रतीक भएका जनाएको छ । यो समाजमा मानवताको धारा अविरल बहिरहेकै छ भन्ने उज्ज्वल प्रमाण भएको उसको भनाइ छ ।
अभियानको पहिलो दिन भदौ ६ गते नेपालभरका ब्रह्माकुमारीज शाखाहरूले कहाँ कति रगत संकलन गरे त ?
काठमाडौं क्षेत्र : १,७४५ पिन्ट
विराटनगर क्षेत्र : १,३०२ पिन्ट
नारायणगढ क्षेत्र : ८१२ पिन्ट
नेपालगञ्ज क्षेत्र : २५६ पिन्ट
वीरगन्ज क्षेत्र : २२० पिन्ट
पोखरा क्षेत्र : १४९ पिन्ट
दाङ क्षेत्र : १३७ पिन्ट
बुटवल क्षेत्र : १२१ पिन्ट
हेटौंडा क्षेत्र : ११३ पिन्ट
जनकपुर क्षेत्र : १०० पिन्ट
भैरहवा क्षेत्र : ६७ पिन्ट
राजविराज क्षेत्र : २५ पिन्ट
कुल : ५,०५७ पिन्ट
यो अभियान ९ गतेसम्म सञ्चालन हुने छ । नेपाल–भारतका सयौं स्थानमा रगत संकलन गर्न हजारौं स्वयंसेवक खटिएका छन् ।
