काठमाडौँ। विश्व एक्वेटिक जुनियर च्याम्पियनसिपमा सहभागी हुन चार सदस्यीय नेपाल पौडी टोली भोलि रोमानियाको ओटोपेनी जाने भएको छ ।
अगष्ट १५ देखि २१ तरिखसम्म हुने प्रतियोगितामा नेपाल नम्बर वान इर्भिन श्रेष्ठ र प्रारम्भ भण्डारीले प्रतिस्पर्धा गर्नेछन् । इर्भिनले ५० मिटर फ्रिस्टायल र ५० मिटर ब्रेस्टस्ट्रोक तथा प्रारम्भले ५० र १०० मिटर ब्याकस्ट्रोकमा खेल्नेछन् ।
१०० र २०० मिटर ब्याकस्ट्रोकमा प्रारम्भका नाममा राष्ट्रिय कीर्तिमान छ । टिम अफिसियलमा रविन श्रेष्ठ र गीता शिवाकोटी छन् । टोलीलाई सफलताको शुभकामना दिँदै राष्ट्रिय खेलकुद परिषद्का सदस्य–सचिव टङ्कलाल घिसिङले आज बिदाइ गर्नुभयो । रासस
