काठमाडौं । नेकपा (एमाले) का नेता गोकुल बास्कोटाले सर्वदलीय बैठकमा प्रधानमन्त्री र गृहमन्त्रीको अनुपस्थितिप्रति असन्तुष्टि व्यक्त गरेका छन्।
बुधबार सामाजिक सञ्जालमार्फत प्रतिक्रिया दिँदै बास्कोटाले प्रधानमन्त्री र गृहमन्त्री सर्वदलीय बैठकमा सहभागी नहुनु उनीहरूको राजनीतिक मान्यता, स्वभाव र उदयको आधारलाई हेर्दा दुःखद विषय नभएको टिप्पणी गरेका हुन्।
उनले व्यंग्यात्मक शैलीमा प्रधानमन्त्री र गृहमन्त्रीलाई लक्षित गर्दै, “उहाँहरू त मशान जाग्ने बेला मात्रै बिउँझिनुहुन्छ, अनि सामाजिक सञ्जालमा मात्र साक्षात्कार हुनुहुन्छ। कहिले होटल र नाकामा छापा मार्दा धम्क्याउँदै गर्जिएको देखिन्छ,” भनेका छन्।
बास्कोटाले यस घटनामा सबैभन्दा दुःखद पक्ष भनेको सत्तारूढ दलका सभापति आफ्नै सरकारप्रति निरीह देखिनु रहेको टिप्पणी गरेका छन्।
