काठमाडौँ। नेपाली काँग्रेसका सभापति गगनकुमार थापाले धार्मिक सहिष्णुता र सामाजिक सद्भाव कायम राख्न सबै राजनीतिक दलहरू एकमत हुनुपर्ने बताउनुभएको छ ।
राष्ट्रिय स्वतन्त्र पार्टी (रास्वपा) को अग्रसरतामा सुनसरीमा विकसित पछिल्लो घटनाक्रम र सामाजिक सद्भावको विषयमा छलफल गर्न बुधवार सर्वदलीय बैठकपछि सञ्चारकर्मीहरुसँग कुरा गर्दै उहाँले यस्तो बताउनुभएको हो ।
सभापति थापाले वर्तमान संवेदनशील परिस्थितिमा प्रमुख राजनीतिक दलहरूलाई एकै ठाउँमा ल्याउने रास्वपा र सभापति रवि लामिछानेको पहलकदमीप्रति आभार प्रकट गर्नुभयो ।
उहाँले नेपाली समाजको मेरुदण्डका रूपमा रहेको धार्मिक सहिष्णुता र सामाजिक सद्भाव कुनै उपहार नभई नेपाली नागरिकहरूको साझा प्रयत्नबाट आर्जित पूँजी भएको उल्लेख गर्दै यसलाई जोगाउन सबैले धैर्यता र संयमता अपनाउनुपर्ने बताउनु भयो ।
नेपाली काँग्रेसले यस विषयमा आफ्नो धारणा प्रष्ट पार्दै मातहतका पार्टी पङ्क्ति र स्थानीय जनप्रतिनिधिहरूलाई व्यक्तिगत तवरमै टेलिफोन गरी स्थानीय स्तरमा संवाद र सद्भावका कार्यक्रम सञ्चालन गर्न निर्देशन दिइसकेको जानकारी गराउनु भयो । सभापति थापाले प्रभावित जिल्लाहरूमा सर्वदलीय प्रयासलाई तिब्रता दिँदै सम्भावित अवाञ्छित गतिविधि रोक्न प्रशासन, प्रेस र राजनीतिक दलहरूले ‘प्रो–एक्टिभ’ भएर लाग्नुपर्ने प्रश्ताव गर्नुभयो ।
सभापति थापाले भन्नुभयो, ‘राष्ट्रिय स्वतन्त्र पार्टीले सुनसरीको वर्तमान घटनाको सन्दर्भमा साझा दृष्टिकोण बनाउन सर्वदलीय बैठकको पहल गरेकोमा नेपाली काँग्रेसले धन्यवाद र आभार व्यक्त गरेका छौँ । काँग्रेसले धार्मिक सहिष्णुता र सामाजिक सद्भाव नेपालको साझा सम्पती भएकाले यसलाई जोगाउन सबैले संयम, धैर्य र संवादको बाटो अपनाउनुपर्छ । पार्टीले सार्वजनिक आह्वानसँगै आफ्ना नेता, कार्यकर्ता र स्थानीय जनप्रतिनिधिसँग निरन्तर समन्वय गरी शान्ति र सद्भाव कायम राख्न सक्रिय भूमिका निर्वाह गरिरहेका छौँ । साथै, प्रभावित जिल्ला तथा सम्भावित संवेदनशील क्षेत्रमा समेत सर्वदलीय समन्वय र पूर्वतयारीका साथ शान्ति कायम राख्न सबै राजनीतिक दल, प्रशासन, सञ्चारमाध्यम र नागरिकलाई संयुक्त रूपमा आह्वान गर्ने प्रश्ताव गरेका छाँै । नेपाली काँग्रेसले यस अभियानमा आफ्नो जिम्मेवार भूमिका निरन्तर निर्वाह गर्नेछ ।’
सभापति थापाले संकटको समयमा सरकारको उपस्थिति प्रभावकारी नदेखिएको भन्दै आलोचना गर्नुभयो । –न्युज एजेन्सी नेपाल
