किएभ। युक्रेनका राष्ट्रपति भोलोदिमिर जेलेन्स्कीले भ्रष्टाचार विरोधी निकायको स्वतन्त्रताको प्रत्याभूति दिने विधेयकको मस्यौदालाई आफूले अनुमोदन गरेको बताउनुभएको छ ।
यी परिवर्तनहरूले फेब्रुअरी २०२२ मा रूसी आक्रमणपछि युक्रेनको प्रमुख सहयोगी युरोपेली सङ्घमा पनि चिन्ता प्रकट गरिएको छ । युरोपेली एकीकरणका लागि सुधारहरू आवश्यक रहेको इयूले बताउँदै आएको छ ।
जेलेन्स्कीले भ्रष्टाचारविरोधी निकायसम्बन्धी नयाँ विधेयक बुधबार संसद्मा पेश गर्ने प्रतिबद्धता जनाउनुभएको थियो । जेलेन्स्कीले सामाजिक सञ्जालमा लेख्नुभएको छ, “मैले भर्खरै युक्रेनमा कानूनको शासनको वास्तविक सुदृढीकरण, भ्रष्टाचारविरोधी निकायहरूको स्वतन्त्रता र कुनै पनि रूसी प्रभाव वा हस्तक्षेपबाट कानूनको शासनको भरपर्दो सुरक्षाको ग्यारेन्टी गर्ने कानूनको मस्यौदाको पाठलाई अनुमोदन गरेको छु।”
उहाँले नयाँ विधेयक बिहीबार संसद्मा पेश गरिने जानकारी दिनुभयो । “यो महत्वपूर्ण छ र हामी सबै युक्रेनीहरूको स्थितिको सम्मान गर्दछौं र युक्रेनको साथमा उभिने सबैप्रति आभारी छौं,” उहाँले भन्नुभयो ।
भ्रष्टाचार विरोधी प्रमुख निकायहरूको स्वतन्त्रता हटाउने परिवर्तनहरूको विरोधमा यस हप्ता युक्रेनभरि हजारौँले सडकमा प्रदर्शन गरेका थिए ।
तीन वर्षअघि युद्ध सुरु भएयता यो देशको पहिलो ठूलो प्रदर्शन हो । संसद्ले द्रुत गतिमा अनुमोदन गरेको र सोही दिन जेलेन्स्कीले हस्ताक्षर गरेको उक्त कानुनले युक्रेनको राष्ट्रिय भ्रष्टाचार विरोधी ब्यूरो (एनएबियू) र विशेष भ्रष्टाचार विरोधी अभियोजकको कार्यालय (एसएपिओ) लाई अभियोजक जनरलको प्रत्यक्ष अधिकारअन्तर्गत राख्छ । यो पदको नियुक्ति राष्ट्रपतिले गर्ने प्रावधान राखिएको छ ।(रासस/एएफपी)
