नेकपा (एकीकृत समाजवादी) का अध्यक्ष माधवकुमार नेपालले नेकपा एमालेले पूर्वराष्ट्रपति विद्यादेवी भण्डारी सक्रिय राजनीतिमा फर्किने कुरालाई निषेध गर्नु नहुने बताउनुभएको छ ।
बुधवार काठमाडौंमा आयोजित एक कार्यक्रमलाई सम्बोधन गर्दै उहाँले यस्तो टिप्पणी गर्नुभएको हो ।
उहाँले नेकपा एमाले अध्यक्ष एवं प्रधानमन्त्री केपी शर्मा ओलीप्रति लक्षित गर्दै आफ्नो नेतृत्व खोसिएला भन्ने डरले प्रवेश निषेध गरिने प्रवृत्ति राम्रो नभएको बताउनु भयो । उहाँलै कम्युनिष्ट पार्टीका नेताहरुको सक्रियता अहिले जरुरी भएको बताउनु भयो । उहाँले आज कम्युनिष्टहरु धेरै समूहमा विभाजित रहेको भन्दै विभाजित भएका समूहहरु एक आपसमा छलफल गरेर एउटै हुन जरुरी रहेको बताउनु भयो । अलग अलग पसल थापेर बस्नु राम्रो नभएकाले एउटै हुनेगरी अघि बढ्न जरुरी रहेको बताउनु भयो ।
अध्यक्ष नेपालले भन्नुभयो, ‘कम्युनिष्ट पार्टीका नेताहरुको सक्रियता चाहिएको छ । आज कम्युनिष्ट पार्टी थुप्रै समूहमा विभाजित छ । यि विभाजित भएका समूहहरु पनि आपसमा बसेर छलफल गर्ने हो भने धेरै विषयको निरुपण गर्न सकिन्छ । धेरै समस्या समाधान गर्न सकिन्छ । त्यसो हुनाले अलग अलग पसल थापेर बस्नु राम्रो होइन । त्यसको निम्ति हामी गम्भीर बनौँ । र अघि बढाँै । कम्युनिष्ट आन्दोलनमा के रोग छ, त्यसको पहिचान गरौँ । सबैभन्दा ठूलो रोग भनेको व्यक्तिवादको प्रवृत्ति हो । आफूलाई मात्र केन्द्रबिन्दुमा राख्ने रोग हो । सामुहिकताको भावनाको अभाव हो । सानो छलफल गरेर निष्कर्षमा पुग्न सकिन्छ । कोही मान्छे पार्टीमा आउँदा मेरो नेतृत्व खोसिएला भन्ने डरले प्रवेश निषेध गरिने खालका प्रवृत्तिहरु अहिले पनि व्याप्त छन् । यो सबैलाई पनि भनेको होइन फेरि पर्ला । कुनै खासको नाम लिएर भन्न चाहन्न । मम मात्रै गर्ने हो ।’
अध्यक्ष नेपालले पार्टीमा जति धेरै मानिसहरु जम्मा हुन्छन्, जति धेरैको सक्रियता जनाउन सकिन्छ त्यसले आन्दोलनमा फाइदा गर्ने बताउनु भयो ।
