काठमाडौं। विश्व फुटबलका महान् खेलाडीमध्ये एक, क्रिस्टियानो रोनाल्डोले साउदी प्रो लिग क्लब अल-नासरसँग दुई वर्षे नयाँ सम्झौतामा हस्ताक्षर गरेका छन्।
अब उनी सन् २०२७ सम्म क्लबमा रहनेछन्। क्लबले रोनाल्डोसँगको सम्झौता नवीकरण गरेको औपचारिक घोषणा गर्दै उनलाई अझै दुई सिजनसम्म टोलीको हिस्सा बनाउने जानकारी दिएको छ।
चार दशक पार गरिसकेका ४० वर्षीय पोर्चुगिज सुपरस्टार रोनाल्डोले सन् २०२२ को डिसेम्बरमा इंग्लिस क्लब म्यानचेस्टर युनाइटेड छाडेर रियाधस्थित अल-नासरमा आबद्ध भएका थिए। उनले क्लबमा आबद्ध भएपछि मैदानमा उत्कृष्ट प्रदर्शन गरेका छन्। सम्झौता सकिने चर्चा भइरहँदा अल-नासरले उनलाई रोक्न सफल भएको छ।
सम्झौतापछि रोनाल्डोले सामाजिक सञ्जाल इन्स्टाग्राम र एक्स (पूर्व ट्विटर) मा लेखेका छन् – ‘नयाँ अध्याय सुरु हुँदैछ – उही जोश, उही सपना। आउनुहोस्, सँगै इतिहास बनाऔँ।’
यस घोषणासँगै रोनाल्डोले अन्य क्लबको प्रस्ताव अस्वीकार गर्दै अल-नासरप्रतिको आफ्नो प्रतिबद्धता दर्शाएका छन्। यसअघि फिफा अध्यक्ष जियानी इनफान्टिनोले सन् २०२५ मा अमेरिकामा आयोजना हुने क्लब विश्वकपमा रोनाल्डो खेल्न सक्ने संकेत गरेका थिए। उनलाई केही युरोपेली र अमेरिकी क्लबले प्रस्तावसमेत गरेका थिए। तर रोनाल्डोले अल-नासरसँगको यात्रालाई निरन्तरता दिने निर्णय गरे।
