काठमाडौंः परराष्ट्रमन्त्री प्रदीप कुमार ज्ञवाली र अमेरिकी विदेश मन्त्रीबीच बुधबार अपराह्न टेलिफोन वार्ता भएको छ । त्यस अवसरमा उहाँहरुले कोरोनाभाइरसको महामारी विरुद्धको संघर्षका बारेमा आआफ्ना अनुभव सुनाउनु भएको परराष्ट्र मन्त्रालयले जनाएको छ ।
मन्त्रालयका अनुसार दुबै नेताबीच नेपालको सामाजिक आर्थिक विकास प्रयासलाई मद्दत गर्नेगरी भइरहेका विकास साझेदारीको महत्वका बारेमा छलफल भएको थियो ।
त्यस अवसरमा परराष्ट्रमन्त्री ज्ञवालीले नेपालको स्वास्थ्य समेतका विविध क्षेत्रमा भइरहेको अमेरिकी सहयोगप्रति आभार व्यक्त गर्नुभएको थियो ।
अमेरिकी विदेशमन्त्री पोम्पेओले पनि नेपाललाई अमेरिकी सहयोग निरन्तर रहने विश्वास दिलाउनुभएको थियो ।
दुबै पक्षबीच आर्थिक साझेदारीका क्षेत्रमा कोरोनाकालपछि पनि अझ सुदृढ हुनेमा विश्वास व्यक्त गरिएको परराष्ट्र मन्त्रालयले जनाएको छ ।
