एजेन्सी । बलिउड अभिनेता अक्षय कुमार आफ्नै स्टन्टहरू गर्नका लागि प्रसिद्ध छन् । चाहे त्यो ‘खिलाडी’शृङ्खलामा छतबाट हाम फाल्ने होस् वा ब्लू र होलिडे जस्ता फिल्महरूमा पानीमुनि र हावामा कठिन दृश्यहरू गर्ने ।
हालै पिंकभिल्लासँगको कुराकानीमा अक्षयले टिभी कार्यक्रम ‘टम एण्ड जेरी’बाट यस्ता खतरनाक स्टन्टहरू गर्ने प्रेरणा पाएको बताए ।
अन्तर्वार्तामा अक्षयले भने, ‘के तपाईंलाई थाहा छ म यी स्टन्टहरूको लागि कहाँबाट प्रेरणा पाउँछु ? तपाईंलाई विश्वास लाग्दैन, यो टम एन्ड जेरीबाट आएको हो । मलाई टम एन्ड जेरी हेर्न मन पर्छ । मलाई लाग्छ यो कार्यक्रम धेरै हिंसात्मक छ । हो, यो बच्चाहरूको लागि बनाइएको हो, तर यदि तपाईंले यसलाई ध्यानपूर्वक हेर्नुभयो भने, प्रत्येक एपिसोडमा जबरदस्त एक्सन छ । प्रत्येक एपिसोड १०–१२ मिनेटको हुन्छ, र एक्सनले भरिएको हुन्छ । मैले यसबाट धेरै प्रेरणा लिएको छु ।’
केही दृश्यहरूको उदाहरण दिँदै अक्षयले भने, ‘मलाई याद छ एक पटक टम हेलिकप्टरबाट झुण्डिएर तल आएर जेरीलाई समात्छन्, मैले ‘सबसे बडा खिलाडी’मा यो गरेको थिएँ । त्यहाँ एउटा दृश्य छ जहाँ टम विमानबाट झुण्डिएको छ, मैले त्यो ‘खिलाडी ४२०’ मा गरेको थिएँ । अर्को दृश्य छ जहाँ टमले हेलिकप्टर मुनि झुँडिन्छ र जेरीसँग बसेर वाइन पिउँछ, मैले त्यो ‘खतरों के खिलाडी’मा गरेको थिएँ ।’
अक्षय कुमार ‘कन्नप्पा’ नामक फिल्ममा भगवान शिवको भूमिकामा देखिनेछन् । यो फिल्म विष्णु मन्चु र मोहन बाबुको हो । यसमा प्रभास र मोहनलालको पनि क्यामियो छ । फिल्म जुन २७ मा सिनेमाघरमा रिलिज हुनेछ ।
