काठमाडौं । सरकारले सुनसरीको देवानगञ्जमा भएको घटनाबारे छानबिन गर्न पाँच सदस्यीय समिति गठन गरेको छ । गृह मन्त्रालयका सहसचिव भुपेन्द्र थापाको संयोजकत्वमा समिति गठन गरिएको हो ।
सरकारले समितिलाई घटनाको सत्यतथ्य छानबिन गरी एक साताभित्र प्रतिवेदन बुझाउन समय दिएको छ ।
यसैबीच, सुनसरी घटनालाई लिएर आज साँझ ५ बजे केन्द्रीय सुरक्षा समितिको बैठकसमेत बोलाइएको छ ।
देवानगञ्ज गाउँपालिका–३, कप्तानगन्जमा दुई समूहबीच उत्पन्न विवाद नियन्त्रणमा लिने क्रममा प्रहरीले चलाएको गोली लागेर एक जनाको मृत्यु भएपछि स्थानीय प्रशासनले क्षेत्रमा कर्फ्यू आदेश जारी गरेको छ ।
घटनापछि गृहमन्त्री सुधन गुरुङले मन्त्रालयमा सुरक्षा निकायका प्रमुखहरूसँग छलफल गर्नुभएको थियो । छलफलमा नेपाल प्रहरीका महानिरीक्षक (आईजीपी) दानबहादुर कार्की, सशस्त्र प्रहरीका महानिरीक्षक नारायणदत्त पौडेललगायत सहभागी हुनुहुन्थ्यो ।
सोही छलफलपछि घटनाको छानबिनका लागि पाँच सदस्यीय समिति गठन गर्ने निर्णय भएको हो ।
