काठमाडौं । वाणिज्य, आपूर्ति तथा उपभोक्ता संरक्षण विभागले सरकारले प्रतिबन्ध लगाएका वस्तुको अनधिकृत आयात, भण्डारण तथा बिक्री–वितरण नगर्न व्यवसायीलाई चेतावनी दिएको छ।
विभागले साेमबार सूचना जारी गर्दै प्रतिबन्धित वस्तुहरू बजारमा भौतिक तथा डिजिटल प्लेटफर्ममार्फत बिक्री–वितरण भइरहेको सम्बन्धमा उजुरी तथा गुनासो प्राप्त भएको जनाएको छ।
निकासी पैठारी (नियन्त्रण) ऐन, २०१३ को दफा ३ को उपदफा (१) बमोजिम नेपाल सरकारले विभिन्न वस्तुको निकासी तथा पैठारीमा मनाही, नियन्त्रण वा पूर्ण तथा परिमाणात्मक बन्देज लगाउन सक्ने कानुनी व्यवस्था रहेको विभागले स्मरण गराएको छ।
विभागले प्रतिबन्धित वस्तु अनधिकृत रूपमा पैठारी, सञ्चय तथा बिक्री–वितरण गर्ने कार्य कानुनबमोजिम दण्डनीय रहेको जनाएको छ। साथै, सबै पैठारीकर्ता, सञ्चयकर्ता तथा बिक्रेतालाई कानुनले तोकेको दायित्व र सर्त–बन्देज पालना गरी व्यापार व्यवसाय सञ्चालन गर्न आग्रह गरेको छ।
कानुनविपरीतका गतिविधि गरेको पाइएमा निकासी पैठारी (नियन्त्रण) ऐन, २०१३, उपभोक्ता संरक्षण ऐन, २०७५ तथा अन्य प्रचलित कानुनबमोजिम कारबाही गरिने विभागले स्पष्ट पारेको छ।
