काठमाडौँ । राप्रपा नेपालले एकहप्तासम्म चलेको आन्दोलन उपलब्धिमुलक भएको तथ्यलाई दृष्टिगत गर्दै आन्दोलनका कार्यक्रमलाई अझ सशक्त ढंगबाट चाँडो निरन्तरता दिईनुपर्छ भन्ने निष्कर्ष निकालेको छ ।
आज बसेको पार्टी केन्द्रीय कार्य सम्पादन समितिको बैठकले यस्तो निष्कर्ष निकालेको हो । आन्दोलनमा सरकारको दमन र निरंकुश कार्यशैलीको राप्रपा नेपालले निन्दा र भत्सर्ना पनि गरेको छ ।
आन्दोलनमा बढ्दो जनसहभागिताबाट त्रसित सरकारले सिङ्गो काठमाडौँलाई निषेधित क्षेत्र घोषणा गरेर संविधानप्रदत्त अभिव्यक्ति स्वतन्त्रता र विना हातहतियार भेला हुन पाउने अधिकारको उपहास गरेको राप्रपा नेपालको ठहर छ ।
अब काठमाडौं उपत्यकाका विभिन्न पालिकाहरूमा विरोध प्रदर्शन तथा घरदैलो लगायतका कार्यक्रमहरू सञ्चालन गर्नुका साथै उपत्यकाबाहिर देशका विभिन्न भागहरूमा जनप्रदर्शनको आयोजना गर्ने तथा संयुक्त जनआन्दोलन समितिको संरचनालाई स्थानीय तहसम्म विस्तार गरी प्रतिबद्ध एवं जुझारु युवा जमात तयार पार्न सो पार्टीले सुझावसमेत दिएको छ ।
