काठमाडौं। स्वास्थ्य तथा जनसङ्ख्यामन्त्री प्रदीप पौडेलले खेलाडीहरू सम्पूर्ण नेपालीहरूलाई गौरव दिने पात्र भएको बताउनुभएको छ ।
काठमाडौंस्थित शहीद गङ्गालाल राष्ट्रिय हृदय केन्द्रमा आईतवार नेपाली राष्ट्रिय महिला फुटबल टोलीका खेलाडीहरूको स्वास्थ्य परीक्षणका क्रममा आयोजित कार्यक्रममा उहाँले यस्तो बताउनुभएको हो ।
उहाँले खेलाडीले गौरव गर्नेगरी सबै नागरिकलाई एकै ठाउँमा जोड्न सक्ने बताउनु भयो । उहाँले अन्तर्राष्ट्रिय प्रतिष्पर्धामा नेपाली खेलाडीहरू खेलेको खेल नेपालीहरूले आँखा नझिम्काई हेर्ने गरेको जिकिर गर्नुभयो । मन्त्री पौडेलले खेलाडीहरूसँग कुनै नाता तथा निजी सम्बन्ध केही नभए पनि देशको सम्बन्ध रहेको बताउँदै नेपाली खेलाडीहरूले जित्दा आफ्नो इज्जत बढ्छ भन्ने लाग्ने बताउनु भयो । उहाँले विधिको शासन भएको देशमा मात्रै नागरिकहरू सम्मानित हुने बताउँदै युवालाई विधिवत् ढङ्गबाट प्रतिष्पर्धाको पद्धति अभ्यास गर्न खेलकुदले सिकाउने धारणा राख्नुभयो । उहाँले खेलकुदले समाज जोड्ने काम गर्ने बताउँदै राष्ट्रिय एकता समेत प्रश्तुत गर्ने बताउनु भयो ।
उहाँले भन्नुभयो, “विधिको शासन भएको देशमा मात्रै नागरिकहरू सम्मानित हुन्छन् । आम युवालाई प्रतिष्पर्धाको पद्धति विधिवत ढङ्गबाट अभ्यास गर्न खेलकुदले सिकाउँछ । समाज जोड्ने काम खेलकुदले गर्छ । राष्ट्रिय एकता प्रश्तुत गर्ने काम खेलकुदले गर्छ । नागरिकलाई एकै ठाउँमा गौरव गर्नेगरी खेलाडीले नागरिकलाई जोड्न सक्नुहुन्छ । नेपालको खेलाडी कुनै अन्तर्राष्ट्रिय प्रतिष्पर्धामा जानुभएको छ र खेलिरहनुभएको छ भने त्या लाइभ अवधि भरी आँखा नझिम्काई हामी नेपालीले हेरिरहेका हुन्छौँ । तपाईंहरूले गोल हान्न लाग्नुभयो भने हामी यहाँ उफ्रिरहेका हुन्छौँ । तपाईंसँग कुनै नाता त पर्दैन, निजी सम्बन्ध त केही छैन तर देशको सम्बन्ध छ । तपाईंले जित्दा मेरो इज्जत बढ्छ भन्ने मलाई लाग्छ । त्यसैले तपाईं त्यो गौरव दिने पात्र हुनुहुन्छ ।”
उहाँले खेल खेल्नको लागि खेलाडीहरूको स्वास्थ्य राम्रो हुनुपर्ने बताउँदै खेलाडीको स्वास्थ्य राम्रो बनाउन राज्यले सुविधा दिन जरुरी रहेको बताउनु भयो ।
