इलाम। यहाँको श्रीअन्तु सामालबुङ खानेपानी आयोजना निर्माण कार्य सम्पन्न भएको छ । आज एक कार्यक्रमकाबीच खानेपानीमन्त्री प्रदीप यादवले आयोजनाको उद्घाटन गर्दै यसले यस क्षेत्रको खानेपानी समस्या समाधानमा उल्लेख्य टेवा पुग्ने बताउनुभयो ।
उहाँले देशका विभिन्न ग्रामीण बस्तीमा शुद्ध खानेपानीको अभाव पूर्ति गर्न सरकारले प्राथमिकताका साथ काम गरिरहेको र सोहीअनुसार यहाँ आयोजना सम्पन्न भएको बताउनुभयो ।
मन्त्री यादवले प्रत्येक नेपालीका घरमा धारा र धारामा सुरक्षित खानेपानी भन्ने दृढ सङ्कल्पका साथ सरकार अघि बढिरहेको बताउनुभयो । उहाँले भन्नुभयो, “खानेपानी समस्याकै कारण देशका कयौँ ठाउँमा नागरिकले बस्ती सार्नुपर्ने अवस्था छ । सरकारले त्यस्ता समस्या समाधानका लागि ठोस योजनाअघि सारेको छ । खानेपानीकै लागि बस्ती सार्नुपर्ने अवस्थाको अन्त्य गर्छौँ ।”
मन्त्री यादवले सरकारले आगामी आर्थिक वर्ष २०८२÷८३ मा सबै नागरिकलाई स्वच्छ र गुणस्तरीय खानेपानी उपलब्ध गराउने तथा सरफाइका क्षेत्रमा लगानी वृद्धि गरेर दिगो विकासको लक्ष्य हासिल गर्ने उल्लेख गर्नुभयो । “विपद्का कारण भत्किएका र अधुरा खानेपानी आयोजनाको मर्मत गरी पानीको पहुँच वृद्धि गर्न स्थानीय तह र उपभोक्ताको सहलगानीमा एकीकृत रूपमा आयोजना सञ्चालन गर्नेछौँ”, उहाँले भन्नुभयो ।
कार्यक्रममा खानेपानी तथा ढल व्यवस्थापन विभागका निर्देशक इञ्जिनियर रामकुमार श्रेष्ठले यस आयोजनाअन्तर्गत सुर्योदय नगरपालिका–४ र ५ का करिब दुई हजार १३४ परिवारका ११ हजार ७६९ जना प्रत्यक्ष लाभान्वित हुने बताउनुभयो । उहाँका अनुसार हालसम्म कूल २५० घरधुरी यस खानेपानी प्रणालीमा जोडिएका तथा यस योजनाअन्तर्गत दुई वटा मुहान (सिद्धी खोला र श्रीअन्तु खोला) बाट पानी सङ्कलन गरिन्छ ।
प्रभावकारी र भरपर्दो आपूर्ति सुनिश्चित गर्न आयोजना ‘पम्पिङ’ तथा ‘ग्राभिटी’ दुवै प्रणालीमा आधारित रहेको निर्देशक श्रेष्ठले बताउनुभयो । यस आयोजनाको क्षेत्रफल १८ दशमलव आठ वर्ग किलोमिटर रहेको छ । आयोजनाको निर्माण आर्थिक वर्ष २०७८/७९ देखि सुरु भएको थियो । आयोजनाको लागत रु ३७ करोड ७२ लाख रहेको र त्यसमा १० प्रतिशत स्थानीय समुदायको साझेदारी रहेको आयोजना उपभोक्ता समितिका अध्यक्ष राजु बम्जनले जानकारी दिनुभयो ।
कार्यक्रममा इलाम क्षेत्र नं १ का प्रतिनिधिसभा सदस्य महेश बस्नेत, कोशी प्रदेशसभा, सुशासन तथा योजना समितिका सभापति खगेश्वरी पौडेल (बन्दना), प्रदेशसभा सदस्य तथा पूर्वमन्त्री शमसेर राई, सूर्योदय नगरपालिका प्रमुख रणबहादुर राई, प्रमुख जिल्ला अधिकारी कल्पना श्रेष्ठ तथा सङ्घीय खानेपानी तथा ढल व्यवस्थापन आयोजना इलामका प्रमुख उत्सव पोख्रेललगायतका उपस्थिति रहेको थियो । रासस
