एजेन्सी । रुससँगको कुनै वार्तापछि युक्रेनलाई सुरक्षा ग्यारेन्टीहरू प्रदान गर्न इच्छुक ३० युरोपेली र नाटो देशका सैन्य प्रमुखहरू मङ्गलबार पेरिसमा भेट गर्दैछन् ।
रुसले छिमेकी युक्रेनमा आक्रमण गरेको तीन वर्षभन्दा बढी समय भएपछि युरोपले आफ्नो सुरक्षा बढाउन र संयुक्त राज्य अमेरिकामाथिको निर्भरताबाट मुक्त हुन सङ्घर्ष गरिरहेको छ ।
अमेरिकी राष्ट्रपति डोनाल्ड ट्रम्पले ट्रान्सअटलान्टिक गठबन्धनलाई उल्ट्याउँदै र मस्कोसँग पुनर्मिलन खोज्दै गरेको बेला यी कदमहरू आएका हुन् ।
ट्रम्पले आफ्ना रुसी समकक्षी भ्लादिमिर पुटिनसँग सञ्चार पुनः सुरु गर्नुभएको छ र युक्रेनका राष्ट्रपति भोलोदिमर जेलेन्स्कीको आलोचना गर्नुभएको छ । यसबाट किएभ र युरोपेली सहयोगीहरू बीच ट्रम्पले युक्रेनलाई रुसको पक्षमा सम्झौता स्वीकार गर्न बाध्य पार्नुहुन्छ भन्ने डर उत्पन्न भएको छ ।
ट्रम्पले किएभलाई सैन्य सहायता र गुप्तचर–साझेदारी पनि निलम्बन गर्नुभएको छ ।
अधिकारीहरूसँग भएको वार्तामा युक्रेनले रुससँग हवाई र नौसैनिक युद्धविरामको प्रस्ताव गर्ने थियो ।
फ्रान्सेली सेनाले बेलायत र टर्कीसहित ३० युरोपेली र नाटो राष्ट्रका सैन्य प्रमुखहरूको पेरिस बैठक सोही दिन हुने बताएको छ ।
नाटो सैन्य कमान्डसँग कडा समन्वयमा भइरहेको बताउनुहुने राष्ट्रपति इमानुएल म्याक्रोनले बैठकलाई सम्बोधन गर्नुहुनेछ ।
म्याक्रोन र बेलायती प्रधानमन्त्री किर स्टार्मरले युक्रेनमा सम्भावित युद्धविराम लागू गर्न तथाकथित ‘इच्छुकहरूको गठबन्धन’ गठन गर्ने प्रयासको नेतृत्व गरिरहनुभएको छ ।
युरोपका पाँच प्रमुख सैन्य शक्तिहरू – फ्रान्स, बेलायत, जर्मनी, इटाली र पोल्यान्ड – का रक्षामन्त्रीहरूबीच त्यसपछि बुधबार फ्रान्सेली राजधानीमा भेट हुनेछ ।
ती वार्ताहरू ‘युरोपको आवश्यक पुनःशस्त्रीकरण’ र युक्रेनलाई सैन्य समर्थनमा केन्द्रित हुने फ्रान्सेली रक्षामन्त्रीका सहयोगीहरू मध्ये एकले बताएका छन् ।
स्टार्मरले बदलामा युद्धविरामको समर्थन गर्न इच्छुक राष्ट्रहरूका नेताहरूसँग शनिबार भर्चुअल वार्ता गर्नुहुने उहाँको कार्यालयले बताएको छ ।
म्याक्रोनले गत हप्ता युक्रेनमा कुनै पनि युरोपेली सेना ‘शान्ति सम्झौतामा हस्ताक्षर भएपछि मात्र यसलाई पूर्ण सम्मान गरिएको सुनिश्चित गर्न’ तैनाथ गरिने बताउनुभएको थियो ।
उहाँले फ्रान्सको आणविक प्रतिरोधलाई युरोपेली साझेदारहरूमा विस्तार गर्न छलफल गर्न तयार रहेको पनि बताउनुभएको छ ।
वासिङ्टनले यस क्षेत्रबाट आफ्नो ध्यान मोडेपछि संयुक्त राज्य अमेरिकापछि नाटोको दोस्रो ठूलो सेना र कालो सागरको तटरेखा भएको टर्कीले युरोपको सुरक्षामा महत्त्वपूर्ण भूमिका खेल्न खोजिरहेको छ ।
टर्कीका राष्ट्रपति रेसेप ताएप एर्दोआनले जेलेन्स्कीको हवाई र नौसेना युद्धविरामको आह्वानमा आफ्नो समर्थन दिनुभएको छ ।
