काठमाडौं । राष्ट्रिय प्रजातन्त्र पार्टी (राप्रपा) का पूर्वमहामन्त्री डा. धवलशमशेर राणाको नेतृत्वमा ‘जय नेपाल पार्टी’ निर्वाचन आयोगमा दर्ता भएको छ ।
राणाले शुक्रबार ७९ सदस्यीय केन्द्रीय समिति रहने गरी नयाँ राजनीतिक दल दर्ता गराउनुभएको हो । आयोगमा दर्ता गरिएको दलको चुनाव चिन्ह ‘त्रिभुज’ राखिएको छ भने पार्टीको झण्डामा सेतो रङमा त्रिभुज अंकित गरिएको छ ।
नयाँ दल गठनमा मेडिकल व्यवसायी तथा अभियन्ता दुर्गा प्रसाईंको समेत संलग्नता रहने चर्चा भए पनि अन्ततः प्रसाईंको सहभागिताबिनै राणाले दल दर्ता गराउनुभएको हो । शक्ति बाँडफाँटका विषयमा सहमति जुट्न नसकेपछि दुवै पक्षले छुट्टाछुट्टै ढंगबाट राजनीतिक दल गठनको प्रक्रिया अघि बढाएका हुन् ।
राणाको नेतृत्वमा दर्ता भएको नयाँ दलले आगामी निर्वाचनलाई लक्षित गर्दै संगठन विस्तार र राजनीतिक गतिविधि अघि बढाउने तयारी गरेको जनाइएको छ ।
