काठमाडौं । हुम्लामा अवैध रूपमा नेपाल भित्र्याइएको प्रतिबन्धित चिनियाँ मदिरा प्रहरीले बरामद गरेको छ। नाम्खा गाउँपालिका–२, नावलथाङबाट प्रहरीले रु. ५१ लाख ९३ हजार ६ सय बराबरको चिनियाँ मदिरा बरामद गरेको हो।
जिल्ला प्रहरी कार्यालय हुम्लाका अनुसार साउन २८ गते जिल्ला प्रशासन कार्यालय, जिल्ला प्रहरी कार्यालय, सशस्त्र प्रहरी बल नं. ४४ गुल्म हुम्ला, राष्ट्रिय अनुसन्धान विभाग हुम्ला तथा कोष तथा लेखा नियन्त्रण कार्यालयका प्रतिनिधिसहितको संयुक्त टोलीले नावलथाङमा बेवारिसे अवस्थामा राखिएको मदिरा बरामद गरेको हो।
बरामद मदिरामध्ये ‘झिनिगिन्टी’ (रक्सी) ५९४ कार्टुनमा रहेका ७ हजार १२८ बोतल र ‘चाइनिज बोर्ड भाइजर’ (बियर) १९४ कार्टुनमा रहेका ४ हजार ६५६ बोतल रहेका छन्।
चीनबाट अवैध रूपमा नेपालतर्फ ल्याई बेवारिसे अवस्थामा राखिएको उक्त प्रतिबन्धित मदिरा प्रहरीले बरामद गरी साउन २९ गते पत्रकार सम्मेलनमार्फत सार्वजनिक गरेको जिल्ला प्रहरी कार्यालय हुम्लाले जनाएको छ।
प्रहरी निरीक्षक एवं जिल्ला प्रहरी कार्यालय हुम्लाका प्रवक्ता तथा सूचना अधिकारी युवराज ढकालले बरामद मदिराको बजार मूल्य रु. ५१ लाख ९३ हजार ६ सय रहेको जानकारी दिए।
